Ot aýyzdy, oraq tildi Orazaly bir kezderi osy oqý ordasynda bilim alǵan edi. Maqamy mańǵaz aıtysker aqynnyń atymen atalǵan shaǵyn aýdıtorııanyń esigi óleń ólkesine bet alǵan tálimgerler úshin qashanda aıqara ashyq. Munnan aqynnyń ómir jyry, kóńil syrynan habar berip, shyǵarmashylyq jolynan syr shertetin kitaptar men estelikterdi de taba alasyz. Aýdıtorııanyń ashylý saltanatyna arnaıy kelgen qabyrǵaly qalamgerler, otyzǵa tolar-tolmas shaǵynda aramyzdan ketken shaıyrdyń el aýzynda áli kúnge deıin aıtylyp kele jatqan otty shýmaqtaryn oqyp, jyly esteliktermen bólisti.
«Orazaly kózi tirisinde respýblıkalyq jáne halyqaralyq aıtystarda top jaryp, aqtańger aqyn atanýymen birge aıtys ónerinde ózindik mektebin qalyptastyryp ketken talant ıesi. Ony máńgi este saqtaý tirilerdiń paryzy dep bilemiz. Osy maqsatpen biz búgin «Meniń pirim - Súıinbaı» III respýblıkalyq stýdent-aqyndar aıtysyn Orazaly Dosbosynov atyndaǵy jas aqyndar ortalyǵyn ashýdan bastaǵaly otyrmyz. Bul bizdiń Orazaly túlegimizdiń rýhyna degen qurmet dep bilińizder. Bul mektepten eldiń muńyn muńdap, joǵyn joqtaǵan, oıy ushqyr, shabyty shalqar jas aqyndar legi qanat qaǵady dep senemiz», deıdi ýnıversıtet rektory Takır Balyqbaev.
Resmı sharanyń sońy respýblıkalyq stýdentter aıtysyna ulasty. Elimizdiń otyzǵa tarta joǵary oqý oryndarynan kelgen jas aıtyskerler otty aqynnyń esimin ulyqtap, jyrdan shashý shashty.
Arman OKTIаBR,
«Egemen Qazaqstan»
ALMATY
