Elimizdegi eń úzdik badmıntonshylar jınalǵan jarysta ulttyq qurama kóshbasshysy Dmıtrıı Panarın (Qostanaı) qarsylas shaq keltirgen joq. Ol erler arasyndaǵy básekede top jaryp, chempıon atandy.
Kúmis júldeni Túrkistan oblysynyń ókili Haıtmurat Qulmatov ıelense, úzdik úshtikti taǵy bir qostanaılyq sportshy Arman Myrzabekov tuıyqtady.
Qyzdar arasyndaǵy fınaldyq kezdesýde Túrkistan oblysynyń namysyn qorǵaǵan Aısha Jumabek pen Kamıla Syzdyqova kezdesip, alǵashqysy jeńiske jetti.
Qola júlde qostanaılyq Natalıa Sazonovanyń enshisinde.
Badmıntonnan ulttyq quramanyń bas bapkeri Asqar Ormanov bul týrnırdiń ótkizilýi maqsatyn túsindirdi.
«Úzdik 16 sportshynyń basyn qosqan sebebimiz bireý. 19-26 mamyr aralyǵynda Qytaıda badmıntonnan komandalyq eseptegi álem chempıonaty ótedi. Sol synǵa qatysatyn komanda jasaqtaý úshin el úzdikterin taǵy da jınadyq. Shyny kerek, sportshylardyń daıyndyǵy men týrnırdiń ótý barysy kóńilimizden shyqty. Júldegerler tizimin baıqaǵan bolsańyz, negizinen Qostanaı men Túrkistan oblysynyń sportshylary alda ekenin baıqaýǵa bolady. Qazir osy eki oblys badmıntonshylary joǵary básekelestik týǵyzýda. Osy jarystan soń Qytaıdaǵy álem chempıonatyna kimder qatysatynyn josparladyq. Naqty kimderdiń baratynyn álemdik doda jaqyndaǵan soń aıtamyz. Al dál qazirgi sátte erler quramasy Ýgandada ótetin álem kýbogi kezeńine ketkenin habarlaǵym keledi. Dmıtrıı Panarın, Haıtmurat Qulmatov jáne Artýr Nııazov reıtıngilik álem kýbogine attanyp ketti», - deıdi bas bapker.
