О́z úıiniń bir buryshyn shaǵyn sheberhanaǵa aınaldyrǵan 22 jastaǵy Saıat qoly qalt etkende, jumys ústeline otyra qalyp súıikti isimen aınalysady. Alqa, bilezik, júzik, qapsyrma, tumar syndy sándik buıymdardy eshqandaı stanoktardyń kómeginsiz, qol quraldarymen zerlep qalaǵan pishinde bezendiredi. Ásirese qazaqy oıý-órnekterdi zamanǵa saı túrlendirip, bilezik jasaǵandy jany súıetinin aıtady. Súıikti isimen aınalysý eń aldymen kóńilge qýanysh syılasa, ekinshi jaǵynan qosymsha tabys kózi. «Basty maqsatym – ulttyq ónerdiń básin bıiktetý» degen jas zerger óz oıymen bólisti.
– O.Tańsyqbaev atyndaǵy Sándik qoldanbaly óner kolledjiniń aǵashty kórkemdep óńdeý mamandyǵynda bilim ala júrip, janyma jaqyn mamandyqtardy qosa úırenip shyqtym. Sonyń ishinde zergerlikke erekshe yntam aýdy. Bul ǵasyrlar boıy damyp kele jatqan óner týyndysy. Zergerlerge asa qajetti qasıet – sýretshilik, ıkemdilik pen dáldik. Túrli tehnologııalardyń damýy adamnyń qol eńbegine degen qajettilikti jyl sanap tómendetýde. Sol úshin de qoldan jasalatyn buıymdarǵa degen suranys azaıa bastady. Kópshilik baǵasy arzan bolǵan soń shekara asyp kelgen kóshirme buıymdarǵa qyzyǵady. Mundaı áshekeı buıymdardyń barlyǵyn kezinde óz jerimizde qazaqtyń zergerleri daıyndady emes pe? Osy ónerdiń tarıhyn tanyp, syryna tereń boılaǵym keldi. Bala kúnimde kóp sýret salatynmyn. Ásirese oıýlardyń sýretin. Ata-babamyzdan daryǵan tekti ónerdi jalǵap, qazaq zergerlik ónerinde ózimniń qoltańbamdy qaldyrsam degen armanym bar. Ǵalamtordaǵy áleýmettik jeliler arqyly shama-sharqyma qaraı tapsyrys qabyldaımyn. Bolashaqta óz sheberhanamdy úlkeıtsem deımin, – deıdi Saıat Seısenhanuly.
Kóne tarıhtyń kómbesi qazaq dalasynda mys, altyn syndy baǵaly metaldardy ıgerý isiniń tym áride jatqanyn, zergerlik ónerdiń tynysy ejelgi zamandardan-aq óris alǵanyn aıǵaqtaıdy. Sondyqtan bolar, «Zerdiń jaıyn zerger biler, ańnyń jaıyn mergen biler» deıtin halqymyz bul ónerdi ıgergen jandardy aıryqsha qurmettegen. Saıattyń talantyna tamsanyp, áserli áńgimesin tyńdap, shyn máninde tylsym ónerdiń tuńǵıyǵyna boılaýǵa bel baılaǵan azamat ekenin ańdaǵandaı boldyq. Ult murasyn ulyqtaǵan zerdeli jasqa tolaǵaı tabys tiledik.
Arman OKTIаBR,
«Egemen Qazaqstan»
ALMATY
