Kómegi kól-kósir
Sársenbi, 23 mamyr 2012 7:34
Halyq saýlyǵy – ult bolashaǵynyń kepili. Sondyqtan memlekettiń basty baılyǵy bolyp sanalatyn adam densaýlyǵy basty nazarda bolatyny beseneden belgili jáıt. Bul baǵytta elimizde «Salamatty Qazaqstan» sekildi irgeli baǵdarlamalar qolǵa alynyp, júzege asyp jatyr. Onyń syrtynda da qyrýar sharýa atqarylǵanyn kóz kórdi. Sońǵy jyldary respýblıka boıynsha sanıtarlyq avıasııaǵa basymdyq berilgenin bilemiz. Sonymen qatar, kúrejoldyń boıynda medısınalyq beketter ashyp, jolaýshylardyń densaýlyq qaýipsizdigin saqtaý da oıda bar dúnıe.
Sársenbi, 23 mamyr 2012 7:34
Halyq saýlyǵy – ult bolashaǵynyń kepili. Sondyqtan memlekettiń basty baılyǵy bolyp sanalatyn adam densaýlyǵy basty nazarda bolatyny beseneden belgili jáıt. Bul baǵytta elimizde «Salamatty Qazaqstan» sekildi irgeli baǵdarlamalar qolǵa alynyp, júzege asyp jatyr. Onyń syrtynda da qyrýar sharýa atqarylǵanyn kóz kórdi. Sońǵy jyldary respýblıka boıynsha sanıtarlyq avıasııaǵa basymdyq berilgenin bilemiz. Sonymen qatar, kúrejoldyń boıynda medısınalyq beketter ashyp, jolaýshylardyń densaýlyq qaýipsizdigin saqtaý da oıda bar dúnıe. Osy turǵydan alǵanda Qyzylorda oblysynda da birshama sharýa atqaryldy. Máselen, byltyrdyń ózinde sanıtarlyq avıasııa boıynsha oblysta 7285 shaqyrtý bolyp, halyqqa qyzmet kórsetilgen. Endi osyny taratyp aıtaıyq.
Sanıtarlyq avıasııa degende oıǵa birden ushaq pen tikushaqtyń oralatyny jasyryn emes. Degenmen, atalmysh baǵytta tek áýe arqyly qyzmet kórsetiledi desek, aǵat aıtqandyq bolar edi. Bul baǵytta kólikpen de, telefon arqyly da qyzmet kórsetile beredi. Sondaı-aq poıyzben, telemedısına arqyly da aýrýyna shıpa taýyp jatqandar bar. Mysaly, byltyr 431 adamǵa kólik arqyly em jasalyp, ortalyqqa jetkizilgen eken. Al AN-2 ushaǵymen 27 kisige kómek berilgen. MI-8 tikushaǵy arqyly 38 emdelýshiniń jaǵdaıy jasalǵan. Shoıynjolmen kelgen adamdardyń sany 38-di quraǵan. 195 adam telemedısınanyń kómegine júgingen. Telefon arqyly 150 adamǵa aqyl-keńes berilgen. Shalǵaıda jatqan, kóliktiń qatynaýy qıyn eldi mekenderdegi turǵyndarǵa dárigerler áriptesteri jetkenshe telefon arqyly aqyl-keńesin berip, talaı adamnyń ómirine arasha túsip jatyr. Bylaı qaraǵanda, qarapaıym ǵana dúnıe sııaqty. Al astaryna úńilseńiz, talaı taǵdyrdyń telefon tutqasymen aman qalyp jatqanyn sezinesiz.
Taǵy da sandardy sóıletip kóreıik. Bul joly sanıtarlyq avıasııa arqyly birinshi toqsannyń ǵana kórsetkishin aıtsaq ta jetkilikti. Atalǵan qyzmet ókilderi 185 ret aýdandarǵa barǵan. Úsh aıda. Avtokólikpen 130, ushaqpen 37, poıyzben 10, telemedısına arqyly 74, telefonmen 8 adamǵa kómek kórsetilgen. Tikushaqtyń 20 qańtarǵa deıin ǵana oblysta qyzmet kórsetkenin aıttyq. Sol jıyrma kúnniń ishinde tikushaq 8 ret áýege kóterilipti. Bul da az emes. Ol ketkennen keıin AN-2 ushaǵynyń jumysy artqanyn kórip otyrmyz.
Aqmeshit atyrabyndaǵy aq halattylardyń shamasy kelmeıtin de naýqastar bolady. Máselen ekiqabat áıelderde kezdesetin keıbir keselder men bir jasqa deıingi balalarǵa jedel neonataldi kómek kórsetý ázirge bizdiń dárigerler úshin qıyndyq týǵyzady. Onyń túrli sebepteri bar. Osyndaı sátterde oblys dárigerleri kórshi Ońtústik Qazaqstan oblysynyń nemese Astana men Almatydaǵy áriptesteriniń kómegine júginedi. Atalǵan qalalarda arnaıy ǵylymı-zertteý ınstıtýttary men klınıkalar bar. Naýqastar sonda jetkiziledi. Jyl basynan beri 7 adam sanıtarlyq avıasııa arqyly joǵaryda aıtylǵan úsh qalaǵa jetkizilgen.
Jaqynda ǵana oblystyq medısınalyq ortalyqtyń qyzmetkerleri Aral aýdanyna baryp, sonda óte kúrdeli ota jasap qaıtty. Oblystaǵy beldi neırohırýrg-dáriger Shynjyrbaı Orazmahanuly naýqastyń júrýge jaǵdaıy kelmegennen keıin aýdanǵa arnaıy baryp, onyń basyna ota jasady.
– Biz Aral aýdanynda S.Nııazov degen azamattyń basyna ota jasadyq. Jaǵdaıy turaqtalyp, ómirine qaýip tónbeıtin bolǵandyqtan, oblystyq medısınalyq ortalyqqa jetkizdik. Sonymen qatar, Qazaly aýdanynda da bir ekiqabat áıeldiń jaǵdaıy tym aýyrlap, qursaǵyndaǵy bala men óziniń ómirine qaýip tóndi. Bizdiń akýsher-gınekologtar onyń ómirine arasha túsip, aman alyp qaldy. Ol kisi de ortalyqqa jetkizildi. Qazirgi ýaqytta eki naýqastyń da jaǵdaıy jaqsy. Shúkir, – deıdi dáriger.
Sanıtarlyq avıasııa talaı taǵdyrdyń densaýlyǵyn túzep berip, ajaldan arashalap qalyp jatyr. Sol sebepti osy baǵyttaǵy jumystarǵa aldaǵy ýaqytta da tıisinshe qoldaý kórsetile berse degen tilek bar.
Erjan BAITILES,
«Egemen Qazaqstan».
Qyzylorda oblysy.
