Qatysýshylar eki jas sanaty boıynsha synǵa tústi. 10 men 14 jas aralyǵy jáne 15-ten 18 jasqa deıin. Baıqaýdyń tynysy jyl sanap keńip, qatysýshylardyń qatary kóbeıip keledi. Bıylǵy baıqaýǵa 88 jas sýretshi qatysýda. Jarys úlgisine sáıkes portret, natıýrmort, peızaj janrlary boıynsha úı jumysy jáne de Uly dalanyń jeti qyry, jastar elimizdiń bolashaǵy: úzdik laıfhak janrlary boıynsha 3 saǵat ishinde qatysýshylar týyndylaryn usynýy kerek.
–Dástúrge aınalǵan «Boıaýlar qupııasy» sońǵy eki jylda «Rýhanı jańǵyrý» baǵdarlamasy aıasynda ótip jatyr. Birinshi kezeńniń qortyndysyn bezbendegen qazylar jas sýretshilerdiń táp-táýir shyńdalyp qalǵandyǵyn aıtyp otyr. Bizdiń mindet –úzdigin anyqtap, ónerge degen qulshynystaryn arttyrý,–deıdi ónerpaz daryndy balalarmen jumys júrgizý jónindegi oblystyq oqý-ádistemelik ortalyǵy dırektorynyń orynbasary Baqyt Qosqulaqova.
Qorshaǵan ortasyn, óziniń dúnıetanymyn, bala qııalynyń ushqyr oılaryn qaǵaz betine túsirýge talpynǵan jas sýretshilerdiń tańdap alǵan taqyryptary búgingi qorshaǵan orta sekildi jan-jaqty, ári san boıaýly. Aqmola oblysy bilim basqarmasy janyndaǵy ónerpaz daryndy balalarmen jumys júrgizý jónindegi oblystyq oqý-ádistemelik ortalyǵynyń muryndyq bolýymen ótetin atalmysh baıqaý dástúrge aınalǵan.
–Meniń búgingi baıqaýǵa tańdap alǵan taqyrybym «Uly dalanyń Astanasy» dep atalady. Men aýdandyq saıystan 1- shi oryn alyp, oblystyq baıqaýda baǵymdy synaýǵa múmkindik aldym. Men bul jerge kelgenimniń basty maqsaty jeńiý emes, dostarmen tanysyp, shyǵarmashylyǵymdy shyńdaý úshin keldim,–deıdi baıqaýǵa qatysýshy Sandýǵash Seıilova.
–Men ındýktıvtik keskindeme boıynsha eńbek daıyndaýdamyn. Osy baǵytta eki jyl kóleminde aınalysyp júrmin. Al, jalpy sýret salyp júrgenime 14 jyldaı ýaqyt boldy. Qazirgi salyp jatqan týyndym «Uly dalanyń jeti qyry» taqyrybynda,–deıdi baıqaýǵa qatysýshy Anastasııa Soloveva.
Talǵamy taýdaı jas sýretshilerdiń qııalyna qanat bitirip, samǵar kógine erkin qalyqtaý maqsatynda uıymdastyrýshylar arnaıy sheberlik synybyn da nazardan tys qaldyrmaǵan. Baıqaýǵa qatysqan 88 úmitkerdiń 12- si júldeli oryndarǵa ıe bolsa, qalǵan barlyq jas sýretshiler marapattalyp, baǵaly syılyqtar tabystaldy.
Baıqal BAIÁDIL,
«Egemen Qazaqstan»
Aqmola oblysy
