Baspasóz májilisine Zhuldyz TV Media quryltaıshysy Smaıl Jańylbekov, Qazaqstannyń eńbek sińirgen ártisteri Seken Turysbekov, Ramazan Stamǵazıev, Aıgúl Úlkenbaeva, Qazaqstannyń eńbek sińirgen qaıratkeri Muqasan Shahzadaev jáne «Dombyra» telearnasynyń dırektory Qanat Erjigitov qatysty.
Qoǵamdy ulttyq mádenıet pen biregeılikti saqtaý jáne qaıta jańǵyrtý ıdeıasynyń tóńireginde odan ári toptastyrý maqsatynda Elbasynyń sheshimimen shilde aıynyń 1-jeksenbisi «Ulttyq dombyra kúni» bolyp jarııalanǵany belgili. Osyǵan oraı, «Dombyra» telearnasynyń dırektory Qanat Erjigitov «Dombyra» telearnasy – qazaq halqynyń rýhanı jan serigine aınalǵan mýzykalyq tól aspaptaryn, dástúrli ánderi men ulttyq kúılerin halyqqa barynsha nasıhattaıtyn jańa formattaǵy telearna bolýyn kózdeıtinin jetkizdi. «Efırde baǵdarlamalar qazaq tilinde júrgiziledi. Basty maqsaty: dombyra, qobyz, jetigen, sherter, sybyzǵy, sazsyrnaı jáne taǵy basqa aspaptardyń tarıhı qalyptasýy men negizderin, zamanaýı baǵyttaryn, kúıshilik óneri men kórnekti ókilderin keńinen nasıhattaý. О́skeleń urpaqqa jyr, terme, kúı, dástúrli ánder, dástúrli mýzykalyq keshter men ulttyq áýenimizdi jańartylǵan, sapaly formatta taratý da osy murat aıasyna toptasqan. Tanymdyq ári tálimgerlik turǵyda arnaıy baǵdarlama arqyly ulttyq aspaptardy úırenip meńgerý dáristeri turaqty júrgizilip turatyn bolady» deıdi jańa telearnanyń jetekshisi Qanat Erjigitov.
Tól aspaptarymyzdyń qadir qasıetin saqtap, keler urpaqtyń rýhanı ıgiligine aınaldyrýda jańa telearnanyń mańyzy zor bolmaq.
«Dombyra» telearnasy tek Qazaqstandyq ónimdi usynyp, dástúrli aspaptarymyzdy durysynan dáripteıtin Qazaqstan tarıhyndaǵy tuńǵysh telearna. Onyń efırinde otandyq estradanyń burynǵy ókilderi men qazirgi zaman ókilderiniń úzdik jumystary kórsetiletin bolady. Telearnanyń mıssııasy qarapaıym: jastar arasynda patrıottyqty qalyptastyrý jáne mádenıetti ilgeriletý. «Dombyra» telearnasy qazirdiń ózinde Qazaqstannyń kabeldik jelileri «IDTV», ınternet jelisinde YOUTUBE kanaly, áleýmettik jeliler arqyly taratylýda.
Aıgúl AHANBAIQYZY,
«Egemen Qazaqstan»
ALMATY
