Halyqty jumyspen qamtý ortalyǵynda málimdegendeı, qazirgi tańda Astananyń eńbek naryǵynda suranysqa ıe mamandyqtardyń qatarynda tárbıeshiler, naýbaıshylar, aspazdar, tiginshiler, shashtarazdar, elektr men gaz dánekerleýshiler, saýda menedjerleri, baqylaýshylar, kassırler men daıashylar bar.
«Qazir tórt myńnan astam bos jumys orny bar. Alaıda, joǵaryda atalǵan salalarda daıyn mamandardyń tapshylyǵy baıqalady. Jastar óz mamandyqtary boıynsha jumysqa ornalaspaıdy. Basty sebep – mamandyqty durys tańdamaý» delingen ortalyqtyń taratqan habarlamasynda.
Osy rette Halyqty jumyspen qamtý ortalyǵy qysqa merzimdi kýrstardy uıymdastyrýda. Mamandyǵyn ózgertkisi kelgen ár adam jas ereksheligine qaramastan kelip basqa mamandyqqa qaıta oqı alady. Osy jyly Arýjan Aqpar 18 jasqa toldy. Ol UBT-den tıisti upaı jınaı almaı, JOO túse almaǵan. Osylaısha Arýjan Halyqty jumyspen qamtý ortalyǵynyń kómegine júgingen bolatyn. Ol qysqa merzimdi kýrsta oqyp, naýbaıshy mamandyǵyn ıgerip shyqty.
«Halyqty jumyspen qamtý ortalyǵy oqýǵa jáne jumysqa ornalasýǵa kómektesedi degendi estip, qujattarymdy alyp ortalyqqa keldim. Ýaqyt ketirmeı birden naýbaıshy Álııa Sergeevanyń shákirti atandym. Oqý prosesinde nandy pisirý tehnıkasyn jáne tátti taǵamdardyń kóptegen túrlerin pisirip úırendim, sonda praktıkadan óttim, al keıin jumysqa ornalastym», deıdi ortalyq shákirti.
Jas maman óz isiniń naǵyz sheberi atandy. Arýjanǵa tapsyrys berýshiler kóp, al eń bastysy – ol óz jumysyn jaqsy kóredi. Qoly bosaǵanda Arýjan tátti taǵamdaryn áleýmettik jeli arqyly satyp qosymsha tabys tabady.
«Biz jumysy joq adamdarǵa qysqa merzimdi kýrstan ótýdi usynamyz. Bizdiń kýrstar dıplomy, tájirıbesi joq jáne mamandyǵyn aýystyrǵysy keletin jandarǵa arnalǵan. Oqý mamandyq tańdaýyna baılanysty 1 aıdan 3 aıǵa deıin jalǵasady» dedi Astana qalasy Halyqty jumyspen qamtý ortalyǵynyń kásibı maman bóliminiń basshysy Azamat Baıtasov.
2018 jyly Astanada 700-ge jýyq adam qaıta oqytý kýrstarynan ótti. Olardyń 70% turaqty jumysqa ornalasty.
