Dárigerler bastap edi, banktegiler qostady
Juma, 15 maýsym 2012 6:57
Jyl saıyn 14 maýsymda Dúnıejúzilik donor kúnin ótkizý týraly bastamaǵa 4 birdeı halyqaralyq uıym uıytqy bolyp keledi. Bular – DDSU, Qyzyl Krest jáne Qyzyl Jarty aı halyqaralyq federasııasy, Qan donorlaryn uıymdastyrýdyń halyqaralyq federasııasy jáne Halyqaralyq qan quıý qoǵamdastyǵy. Bul uıymdar qandy tegin jáne óz erikterimen tapsyrýǵa úndeıdi.
Juma, 15 maýsym 2012 6:57
Jyl saıyn 14 maýsymda Dúnıejúzilik donor kúnin ótkizý týraly bastamaǵa 4 birdeı halyqaralyq uıym uıytqy bolyp keledi. Bular – DDSU, Qyzyl Krest jáne Qyzyl Jarty aı halyqaralyq federasııasy, Qan donorlaryn uıymdastyrýdyń halyqaralyq federasııasy jáne Halyqaralyq qan quıý qoǵamdastyǵy. Bul uıymdar qandy tegin jáne óz erikterimen tapsyrýǵa úndeıdi.
Bıyl mundaı sharany Almaty qalasyndaǵy qalalyq qan ortalyǵy Dúnıejúzilik donor kúni qarsańynda bastady. Bul ortalyqtyń ózi de 2004 jyly 14 maýsymda qurylǵan. Qalalyq ákimshiliktiń quzyryna qaraıtyn ortalyq Almatydaǵy 20-ǵa tarta medısınalyq mekemege qyzmet kórsetedi. Myńdaǵan adamdardyń ómirine arasha bolǵan qan ortalyǵy qan daıyndaýdyń zamanaýı ádisterin engizip, testilep, donorlyq qan quramynyń qosymsha qaýipsizdigin qamtamasyz etedi.
Al bıylǵy Dúnıejúzilik donor kúni «Álemdi jarylqa!» degen urandy ustanǵan. Bul bastama kezdeısoq apattar men jaraqattardan qan joǵaltyp, sozylmaly qan aýrýlaryna dýshar bolǵan jandardyń ómirin uzartýǵa septesetini sózsiz.
Aldymen bul aksııaǵa qalalyq densaýlyq saqtaý basqarmasynyń basshylyǵymen Almaty dárigerleriniń ózi belsene kirisip, qan tapsyrýdy bastady.
– Bizde qanǵa degen qajettilik óte joǵary, qalanyń ınfraqurylymy ósip keledi, jol-kólik oqıǵasy da jıilegen. Budan bólek, sońǵy jyldary bala týý kórsetkishi de joǵary, – dedi qalalyq Qan ortalyǵynyń dırektory Jandos Nadırov.
Sondaı-aq 12 maýsym kúni Almatydaǵy «Temirbank» AQ-nyń qyzmetkerleri de «Seniń kúniń, donor!» atty qan tapsyrý naýqanyna qatysyp, 43 adam 19 lıtr 350 gramm qan ótkizdi.
Bul sharapatty isti Qarjy ınstıtýtynyń qyzmetkerlerdi basqarý departamentiniń uıymdastyrýymen Respýblıkalyq qan ortalyǵy men «Baýyrjan» qaıyrymdylyq qory birlesip ótkizdi. «Búginnen bastap donor bol» uranymen ótkizilip otyrǵan naýqan Qazaqstandaǵy donorlyq ınstıtýtty damytýǵa úles qosýǵa baǵyttalǵan.
Mundaı ıgi bastama Temirbankte osymen úshinshi ret ótkizilip otyr. Oǵan 2010 jyly – 42, 2011 jyly – 47 adam óz erkimen qatysqan bolatyn. Bıyl jınalǵan qan Respýblıkalyq pedıatrııa ınstıtýty men elimizdiń medısınalyq mekemelerindegi kúrdeli onkologııalyq jáne gematologııalyq syrqat jandarǵa kómek retinde jóneltiletin bolady, – deıdi «Temirbank» AQ-nyń baspasóz qyzmetiniń bas mamany Mádına Keńes.
Aınash ESALI,
«Egemen Qazaqstan».
ALMATY.
