Oblysta qalaıy óndiretin úlken ken orny ashylyp, óńir ekonomıkasyna serpin beredi dep kútilýde.
«Kóp jyldar boıy Qazaqstanda ázirge balamasy joq, al Ortalyq Azııadaǵy iri qalaıy ken orny Aıyrtaý aýdany Syrymbet eldi mekeni mańynda ornalasqan. Bıyl 4 mıllıard teńge kóleminde ınvestısııa quıylady. Joba 2021 jylǵa taman tolyq kúshine enedi. Sol kezde jalpy ınvestısııa kólemi 100 mıllıard teńgege jetedi», dedi Qumar Aqsaqalov.
Zaýyttardy jańǵyrtýdyń nátıjesinde Qazaqstanda shyǵarylmaıtyn ónimder óńirde óndirile bastady. Turmystyq tehnıkaǵa arnalǵan qurylǵylar, aqparattyq qaýipsizdik qondyrǵylary shyǵarylady. Zaýyttardyń tolyqqandy jumys isteýi aldaǵy 3 jylda ónim kólemin 40 prosentke ósirýge múmkindik beredi.
On jylǵa jýyq toqtap turǵan «Bıohım» kásiporny «Bıoopereıshn» degen atpen qaıtadan iske qosylyp, krahmal men kilegeıdi shetelge jóneltýdi bastap ketti. Jyl aıaǵyna qaraı bıoetanol shyǵaratyn seh boı kóteredi. Qaıtalama polımer óńdeıtin biregeı zaýyt ashyldy.
Sheteldik ınvestorlardyń qatysýymen jem jáne aǵash óndiretin, bıdaı óńdeıtin kásiporyndar salý josparlanǵan. Zamanaýı Data-ortalyqty turǵyzýǵa 27 mıllıard teńge ınvestısııa tartylǵan. Aldaǵy eki jylda óńir ekonomıkasyna 80 mıllıard teńge ınvestısııa quıylyp, 1500 adam turaqty jumyspen qamtylady.
О́mir ESQALI,
«Egemen Qazaqstan»
Soltústik Qazaqstan oblysy
