Tarqatyp aıtsaq, 22 aqpan – Qaıyrymdylyq kúni bolsa, 23 aqpan – Tazalyq kúni retinde ótedi. 24 aqpan – Kórshige izet kúni, 25 aqpan – Ustazǵa qurmet kúni, 26 aqpan – Tarıhqa taǵzym kúni, 27 aqpan – Yqylas kúni, 28 aqpan – Urpaqtar sabaqtastyǵy kúni, 1 naýryz – Alǵys aıtý kúni bolmaq.
Bul týraly Shymkenttegi «Qazaqstan halqy Assambleıasy» ǵımaratynda ótken brıfıngte qalalyq QHA tóraǵasynyń orynbasary Muratáli Qalmuratov málim etti.
Shara uıymdastyrýshylary eldi birlikke úndeıtin merekeniń túpki máni kezinde túrli sebeptermen qazaq jerine qonys aýdarǵan etnos ókilderiniń memleket quraýshy ultqa alǵys aıtýy dep túsindiredi.
«Aptalyq ish-sharalardyń basy «Qaıyrymdylyq kúninen» bastaý aldy. Qazaqstan halqy Assambleıasynyń Qaıyrymdylyq kerýeni sheńberinde «Sybaǵa» is-sharasy ótkizildi. Qalalyq assambleıa men túrik etnomádenı birlestigi qurbandyq shalyp, ulttyq dúnıetanymymyzǵa sáıkes jeti túrli azyq-túlikpen tolyqtyrylyp qadirli qarııalarǵa, abzal analarymyzǵa, jas otaý ıelerin qamtyǵan 40-tan astam otbasyǵa sybaǵa retinde úlestirildi. 23 aqpan – Tazalyq kúni retinde belgilense, 24 aqpan – «Kórshige izet kúni» kúninde ótetin is-sharalar eldi berekeli birlik pen yrysty yntymaqqa jetelep, kórshiler arasynda ózara túsinistik pen qurmetti qalyptastyrýdy kózdeıdi. Osy kúni Saıramdaǵy ózbek etnosynyń beldi azamattary kórshiles Shapyrashty, О́temis, Qyzylsý, Tassaı, Mártóbe, Toǵys, Badam, Qarabastaý turǵyn alaptarynyń abzal qarııalaryn, abyroıly azamattaryn syıly qonaq retinde shaqyryp, izetin kórsetetin bolady», dedi Muratáli Orazalyuly.
Qazirgi tańda Shymshaharda aptalyq merekeni jer-jerlerde ótkizýdiń tujyrymdamasy ázirlenip, ár kúnge osylaı arnaıy ataýlar berilip, is-sharalar uıymdastyrylýda.
Nurshat TО́KEN,
«Egemen Qazaqstan»
Shymkent
