«Saıramdaǵy týrızm eki baǵytta damıtyn bolady. Týrızmdi álemdegi eń tabysty bıznestiń biri deýge bolady. Onyń mańyzdylyǵy jyl sanap artyp keledi. Atalǵan sala kóp elderde jalpy ishki ónimniń qalyptasýyna, qosymsha jumys ornyn qurýǵa, sondaı-aq syrtqy saýdanyń belsendiligine yqpal etedi. Jalpy, týrızm salasy basqa da salalardyń damýyna mol múmkindik beredi. Máselen, týrıstik agenttikter, meıramhanalar, sanatorııler, tamaqtaný oryndary, kólik baılanysyn aıtýǵa bolady», – deıdi Saıram aýdany ákiminiń baspasóz hatshysy Dáýren Dúısebekov.
Túrkistan oblysynyń jáne Shymkent qalasynyń jurtshylyǵy Saıram aýdanyndaǵy Aqsý ózeniniń boıynan oryn tepken jazǵy demalys oryndaryna jıi keletini ras. Qazirgi tańda ondaı oryndardyń 14-i maýsymdyq úlgide jumys istep keledi.
Aýdanda týrıstik marshrýt daıyndalǵan. Atalǵan marshrýtqa «Mankent» shıpajaıy, «Syqym baba» jáne «Janys baba» keseneleri engizilip otyr. Týrıstik marshrýttardyń boıynda ınfraqurylymdy jetildirý maqsatynda Saıram aýdany boıynsha «Batys Eýropa – Batys Qytaı» halyqaralyq kólik dálizi boıynda 11 qyzmet kórsetý nysany ornalasyp, qyzmet kórsetýde.
Aǵymdaǵy jyly týrızm salasyn eki baǵytta damytý josparlanyp otyr. Birinshisi – saýyqtyrý týrızmi. Aýdan Shymkent qalasyna jaqyn ornalasqandyqtan jáne «Batys Eýropa – Batys Qytaı» halyqaralyq kólik dálizi aýdan ortalyǵyna jaqyn bolýyna baılanysty, emdik-saýyqtyrý týrızmi jaqsy damyp otyr. Osy jyly Aqsý aýyldyq okrýgine qarasty «Aqsýkent 2» aýylynda 3 qabatty ońaltý, saýyqtyrý ortalyǵyn iske qosý josparlanǵan. Jobanyń quny – 500 mln.teńge.
Ekinshisi – mádenı tarıhı eskertkishter. Halyq arasynda «Saıramda bar sansyz bab, Otyrarda otyz bab, Túrkistanda túmen bab, babtardyń baby Arystan bab, eń úlkeni Halen bab» degen támsil keń taraǵan. Osyǵan oraı, 2017 jyly týrıstik marshrýt daıyndalyp, oǵan joǵaryda atalǵan úsh nysan engizilgen. Osy baǵytqa Qaramurt aýyl okrýginde ornalasqan, Qytaı tarıhnamasynda «sadaǵy men semseri» qolynan túspegen qaharman qolbasshy bolǵan «Halen bap» jáne Kólkent aýylynda ornalasqan Qazaq hany Abylaıhannyń bekinisi bolǵan «Hanqorǵan tóbesin» týrıstik marshrýt tizimine engizip, olardy jan-jaqty damytý, nasıhattaý jumystary júrgizilip jatyr.
