Emhanasy – jańa, dárigeri – dara aımaqta densaýlyq saqtaý salasynda ilgerileýshilik baıqalady
Seısenbi, 10 shilde 2012 7:28
«Dertin bergen Qudaı, shıpasyn da beredi» deıdi halyq danalyǵy. Ásili, shıpa kóp jaǵdaıda dárigerlerdiń qolymen beriledi. Sondyqtan adamzat balasy osynaý bir mamandyq ıeleriniń aldynda árdaıym ózin qaryzdar ekenin sezinip júretin bolsa kerek. Aqmeshitte ashylǵan №3 qalalyq emhanada da osyndaı abzal jandar az emes.
Seısenbi, 10 shilde 2012 7:28
«Dertin bergen Qudaı, shıpasyn da beredi» deıdi halyq danalyǵy. Ásili, shıpa kóp jaǵdaıda dárigerlerdiń qolymen beriledi. Sondyqtan adamzat balasy osynaý bir mamandyq ıeleriniń aldynda árdaıym ózin qaryzdar ekenin sezinip júretin bolsa kerek. Aqmeshitte ashylǵan №3 qalalyq emhanada da osyndaı abzal jandar az emes.
Bul – Elbasy Nursultan Nazarbaevtyń tikeleı muryndyq bolýymen ómirge kelgen «100 mektep, 100 aýrýhana» baǵdarlamasy aıasynda salynǵan emhana ekenin aıtqan abzal. Búginde Qyzylordada halyq sany jyl sanap artyp keledi. Eldiń sany artqan saıyn, halyqqa qyzmet kórsetetin oryndardyń da tapshylyǵy baıqala túsetini belgili. Ásirese, densaýlyq saqtaý salasynda anyq baıqalyp qalyp jatady. Atalmysh emhana bir aýysymda 500-ge tarta adamdy qabyldaı alady. Qaladaǵy №1 jáne №6 emhanalar qashan barsań yǵy-jyǵy adamǵa toly bolatyn. Janyn shúberekke túıip barǵan adamnyń ubaq-shubaq kezekke turyp qajıtynyn qala turǵyndary árdaıym aıtatyn edi. Endi myna №3 emhananyń arqasynda joǵaryda atalǵan eki emdeý ortalyǵyndaǵy jumys azaıatyn boldy.
Emhanada eki bólim bar. Birinshi bólikte eresekter emdeledi. Al balalardy qaraıtyn bólim odan bólek. Ádette balalalar men eresekter emdeletin bir bolyp keledi. Al jańadan salynǵan emhanada ol ekige bólingen. Bul jumysty júıeli jasaýǵa, biri-birine kedergi keltirmeýge óte yńǵaıly ekenin ekiniń biri biledi. Emhananyń ishi tolyqtaı jańa qural-jabdyqtarmen jaraqtalǵan. Bes qarýy saı dese bolady. Ashylǵanyna aptadan jańa assa da kelip emdelýshiler óte kóp. Jalpy emhana boıynsha 383 adam jumys isteıdi. Onyń 106-sy dárigerler. Kúndizgi stasıonary da adamdardy qabyldaýǵa daıyn. Kúnine 50-ge tarta adam osy stasıonardan dertine shıpa taba alady.
Bul emhana Astana, Araı, Sáýlet sekildi shaǵyn aýdandarda ornalasqan 60 myń adamǵa qyzmet kórsetedi. Munyń ózi úlken qýanysh.
Jaqynda respýblıka boıynsha 100 klınıkanyń arasynan úzdikter anyqtaldy. Oblystyq ortalyq aýrýhananyń eń úzdik mekemesiniń arasynan kórinýi de biz úshin zor súıinish. Al osy aýrýhananyń bas dárigeri Narıman Tabynbaev «Eń úzdik menedjer» ataǵyn ıelendi.
Aqjoltaı aqparat bir bul ǵana emes. Hırýrg dárigerlerdiń kásibı sheberligi synǵa túsken halyqaralyq saıys ótti. Osy saıysta oblystyq ortalyq aýrýhananyń hırýrgııa bóliminiń meńgerýshisi Abdýlla Shúlenbaev II oryndy ıelendi. 39 jyldan beri 11 myńnan astam otany sátti jasap, ár kún saıyn adam janyn ajaldan arashalap júrgen dárigerdiń eńbeginiń elengeni bul. Atalmysh syılyq jýyrda Fransııada tabys etilmek.
Negizi, Qyzylorda oblysynda densaýlyq saqtaý salasy boıynsha birtalaı irgeli ister qolǵa alynyp jatyr. Sóz arasynda solardy da aıta keteıik. Aldaǵy ýaqytta perınataldy ortalyq qoldanysqa berilmek. Sondaı-aq bıznestiń áleýmettik jaýapkershiligin arttyrý aıasynda bólingen qarjyǵa qalalyq perzenthana salynady. Sonymen birge, 200 oryndyq balalar jáne 300 oryndyq qalalyq aýrýhananyń da qurylysy jaqyn kúnderi bastalmaq.
Erjan BAITILES,
«Egemen Qazaqstan».
Qyzylorda.
