Osy materıalǵa taqyryp qoıar kezde belgili memleket jáne qoǵam qaıretkeri, kezinde qazaq KSR mınıstrler keńesi tóraǵasynyń orynbasary, Ortalyq komıtettiń hatshysy jáne Oral oblysynyń basshysy sekildi joǵary laýazymdy qyzmetterdi abyroımen atqaryp, halyqtyń alǵysyn arqalaǵan azamat Mustahım Yqsanovtyń aıtqan sózi oıymyzǵa oralǵan edi. Gáp mynada. Ol kisi 1975 jyldyń kókteminde Oral oblystyq partııa komıtetiniń birinshi hatshysy bolyp taǵaıyndalyp, Jaıyq boıyndaǵy qyzmetin bastaıdy. Osy kezde oblystyq atqarý komıteti ǵımaratynyń tóbesinde «Bizdiń maqsatymyz – komýnızm» degen iri áriptermen jazylǵan aıshyqty jazýlar kúndiz-túni turǵyndardyń kózin arbap turýshy edi. Komýnıstik ıdeıalardyń beleń alyp turǵan kezi.
Alaıda, soǵan qaramastan, Musekeń janyndaǵylardan myna jazý ne dep tur, neni bildiredi dep suramaı ma? Oblys basshysynyń túpki oıyn dóp basyp aıta almaǵan olar qapelimde ne dep jaýap qaıtararyn bilmeı, tosylyp qalady. Sonda M.Yqsanov oǵan ózi jaýap qaıtaryp, bul tym jalpylama aıtylǵan sóz. Munda eshqandaı naqytylyq joq. Budan da bizdiń maqsatymyz 270 otbasyna úı berý dep jazbaısyzdar ma deıdi de, komýnızmdi kóksegen urandy aldyrtyp tastaıdy. Sol kezde bulaı aıtýǵa da, bulaı isteýge de bolmaıtyn. Alaıda, Yqsanov eshkimnen qaımyqpaı, tup-týra osylaı isteıdi.
Qoǵam qaıratkeri osy aıtqan sózinde turdy da. 5-6 jyldyń ishinde Oral qalasynda turǵyn úı qurylysy qyzý qarqyn alyp, júzdegen otbasy derbes baspanaǵa ıe boldy. Tálim ala júrerlik osy jaıtty eske salyp otyrǵan sebebimiz, osyǵan uqsas qaıratkerlik rýhtaǵy kórinis Aqtóbe oblysynda bolyp otyrǵany. Atap aıtqanda, óńirde taıaýdaǵy jyldarda myńdaǵan degen ólshemmen esepteletin otbasynyń óte úlken shoǵyry men qalyp toptaryn baspanamen qamtý jóninde bıik meje belgilengen.
Soǵan sáıkes 2030 jylǵa deıin otbasyndaǵy árbir turǵynǵa shaqqanda kem degende otyz sharshy metr baspana bolýy jónindegi baǵdarlama qolǵa alynǵan. Bul jóninde oblystyq máslıhattyń qurylys, kólik jáne turǵyn úı kommýnaldyq sharýashylyǵy jónindegi turaqty komıssııanyń májilisinde oblys ákiminiń orynbasary Serik Tólenbergenov baıandap berdi.
Bolashaqqa belgilengen bul josparymyz Memleket basshysynyń Qazaqstan halqyna arnaǵan Joldaýynda qoıylǵan mindetterge sáıkes óristep otyr. Sóz joq, munyń ózi oryndalmastaı kórinetin asa aýqymdy is. Degenmen, kóz qorqaq, qol batyr degendeı, osyndaı ótkel bermes asýǵa táýekeldik jasaǵan jaıymyz bar. Tetikti ornynan qozǵaý úshin birinshi kezekte jyl saıyn júrgiziletin qurylys kólemin 8-10 paıyz deńgeıge deıin ósirýdi uıǵaryp otyrmyz dedi ol budan ári. Osy asqaraly jobaǵa baılanysty óz oı-pikirleri men usynystaryn ortaǵa tastaǵan máslıhat depýtattary birinshi kezekte baspananyń qoljetimdilik sıpaty men sapasy turýy kerektigin málimdedi.
Sondaı-aq, olardyń oıynsha, turǵyzylǵan baspanalar eń aldymen turǵyndardyń áleýmettik-turmystyq jaı-kúıi kúrdeli bólikterine berilýge tıis. Atalǵan másele oblystyq máslıhattyń aldaǵy ótkiziletin sessııasynda qaralmaq.
Temir QUSAIYN,
AQTО́BE
