11-21 aqpan aralyǵynda jergilikti memlekettik organdardyń, oblystyq basqarmalardyń, quqyq qorǵaý organdary men kommýnaldyq qyzmetterdiń basshylary men mamandary 7154 suraqpen 6359 adamdy qabyldady. Azamattardy qabyldaý Aqtóbe qalasynyń tórt jerinde jáne oblystyń ár aýdanynda ótkizildi.
Negizinen azamattardy turǵyn úı alý, ataýly áleýmettik kómek taǵaıyndaý, bilim berý, densaýlyq saqtaý, turǵyn úı-kommýnaldyq sharýashylyq, jumysqa ornalastyrý jáne t.b. salalarǵa qatysty máseleler qyzyqtyrady.
Kóptegen másele kún tártibinen jedel túrde alynyp tastalyp jatyr. Sonymen, 1231 másele oń sheshilip, 4944 túsinikteme men keńes berildi, 979 ótinish sheshilip jatyr.
«55 adam turǵyn úı alýǵa kezekke qoıylyp, 27 adam turaqty jumys oryndaryna ornalastyryldy, 27 adam biliktilik kýrstaryna jiberildi, 39 bala tegin seksııalar men úıirmelerge jazyldy, 15 oqýshy tegin tamaqpen qamtylyp, 27 bala balabaqshaǵa tegin ornalasty, sondaı-aq, 289 otbasyna ataýly áleýmettik kómek kórsetildi», - dep habarlady О́ńirlik kommýnıkasııalar qyzmetinen.
Aımaqta asa muqtaj otbasylarymen jumys isteý úshin 25 mobıldi top jumys isteıdi, olardyń quramyna depýtattar, qoǵamdyq belsendiler jáne memlekettik qurylymdardyń ókilderi kiredi.
Top ókilderi ótinish berýshilerdiń turmys jaǵdaıymen tanysý jáne otbasyna qandaı naqty kómek berý kerektigin baǵalaý úshin árbir mekenjaıǵa barady.
Jalpy 147 otbasyna kómek kórsetildi. Mysaly, «Aktobestroıekspert» kompanııasynyń dırektory Jastalap Janbaýov Sadýovtarǵa jaıly páter syılady. 47 jasar «Altyn alqa» ıegeri Saltanat Sadýovanyń segiz balasy bar, onyń ekeýiniń múgedektigi bar, joldasy da 2-toptaǵy múgedek.
Alty balanyń anasy Galına Novıkovaǵa jer telimin alýǵa sertıfıkat berildi, al jergilikti kásipker úı salyp berý mindetin aldy.
30 otbasy kómirmen, 79 januıa kıim-keshekpen qamtamasyz etilip, 6 balanyń joǵary oqý ornynda oqý aqysy tólendi, 5 adamnyń kommýnaldyq qyzmet boıynsha qaryzdary tólendi. Materıaldyq kómektiń jalpy somasy 24,5 mln teńgeden asty.
Naqty kómek alatyndardyń qatarynda kóp balaly analar ǵana emes. Qalamqas Onǵarbaeva 2016 jyly gýmanıtarlyq kolledjdi bitirgen.
«Men jumysqa ornalasa almaı júrdim. Al azamattarǵa qabyldaý júrip jatqanyn estigende, jumysqa ornalasý máselesimen ótinish bildirip, túıindememdi qaldyrǵanmyn. Meni №29 mektep jumysqa shaqyrdy. Nátıjesinde, meniń qazaq tili men ádebıet pániniń muǵalimi bolyp jumys istegim kelgen armanym oryndaldy», - dedi qýanyshty jańalyǵymen bólisken jas maman.
13 aqpan kúni qala turǵyny Sveta Tájibaeva qoǵamdyq qabyldaýǵa ózine jumys taýyp berýge ótinish bildirgen. Ol bir kezderi tárbıeshilikti meńgergen, biraq eshqashan mamandyǵy boıynsha jumys istep kórmepti.
«Meniń suraǵym osynsha qysqa merzimde sheshiledi dep kútpegen edim. Qazir men №28 «Kórkem» balabaqshasynda jumys isteımin. Men bul aksııa aıasynda júzdegen adamnyń naqty kómek alǵanyna senimdimin», - deıdi ol.
