Kazakh Tourism Úkimet tapsyrmasy boıynsha ótken jyly eldik týrıstik brendti ázirleýge kiristi. Onyń aıtýynsha, brend ázirleý men memlekettik baǵdarlamany qabyldaý uzaqqa sozylatyn úderis ekenin túsine otyryp, BAQ pen ınternette qazaqstandyq týrızm týraly kontentti ulǵaıtýǵa basa kóńil bólý týraly sheshim qabyldandy.
«Eń aldymen, biz Qazaqstan týraly aqparattyń áleýmettik jelilerde kóp bolýyna qatysty jumystar júrgize bastadyq. О́tken jyly Qytaıdyń jazylýshylar sany 100 mln-nan asatyn tanymal blogerleriniń elimizge kelýin uıymdastyrdyq. Blogerler Astananyń, Shýchınsk-Býrabaı shıpajaı aımaǵynyń, Almaty men Almaty oblysynyń, Shyǵys Qazaqstan men Túrkistan oblystarynyń týrıstik nysandaryn aralady. Búginde olardyń jarııalanymdarynyń qamtylý deńgeıi 150 mln-nan astam qytaılyq oqyrmandardy quraıdy jáne olardyń sany kún saıyn ósýde» dedi R. Kúzembaev.
Sonymen qatar, Qazaqstan týrızminiń elshiler ınstıtýtyn qalyptastyrý jumystary bastaldy: alǵashqy elshi retinde tanymal qazaqstandyq ánshi Dımash Qudaıbergen tańdaldy.
«Dımashtyń qytaılyq jankúıerler men Ońtústik-Shyǵys Azııa men Eýropanyń keıbir elderindegi mýzyka súıer qaýym arasyndaǵy erekshe tanymaldyǵyn nazarǵa ala otyryp, 10 elden jankúıerler qozǵalystarynyń kóshbasshylarynyń qatysýymen «Dımashtyń Otany» atty promo-týr ótkizdik, oǵan qatysýshylar Qazaqstannyń 3 qalasynda boldy. Atalǵan qozǵalystarda jalpy 5 mln-nan astam adam bar. Ánshiniń jankúıerleriniń úlken qyzyǵýshylyǵyn baıqadyq. Jaqyn arada Dımash Qazaqstanda eki konsert ótkizedi, oǵan onyń fanattary keletini sózsiz jáne de «Dımashtyń Otany» týry aıasynda týrıster Qazaqstan qalalaryn aralaı alady. Osylaısha, otandyq týrızmniń damýyna óz úlesterin qosady» dedi ol.
R. Kúzembaevtyń aıtýynsha, kelesi elshiler tanymal ǵaryshkerler Talǵat Musabaev, Anatolıı Arsebarskıı, Iýrıı Malenchenko jáne Iýrıı Batýrın bolmaq. Keńes ýaqytynda Alakól kólinde ǵaryshqa ushyp kelgennen keıin ushqysh-ǵaryshkerlerdi medısınalyq ońaltý kezeńderiniń biri ótkizildi. Sondyqtan da, olar osy dástúrdi jańǵyrtý úshin kýrorttyq aımaqqa shaqyryldy.
Sıfrlyq marketıngpen qatar, dástúrli tásilder boıynsha da jumystar atqarylyp jatyr. 2018 jyly Kazakh Tourism-niń uıymdastyrýymen Berlınde, Máskeýde, Beıjińde, Gonkongta jáne birqatar basqa da qalalarda ótken 7 halyqaralyq kórmege qazaqstandyq týrbıznes qatysty.
«Etnıkalyq erekshelik arqyly kelýshilerdiń qyzyǵýshylyǵyn oıata aldyq. Oǵan boılary 2 metrden joǵary qazaq batyrlary, mýzykanttar, qolónershiler tartyldy, asyqtardan kádesyılar jıyntyǵy ázirlendi. Stendti batyrlarmen, ulttyq ashana boıynsha sheberlik-synyptarymen, ulttyq mýzyka men bılermen etnıkalyq túrde toltyrý erekshe áser qaldyrdy» dedi R. Kúzembaev.
Budan ózge, elordanyń 20 jyldyǵyn merekeleý aıasynda Qazaqstannyń barlyq derlik jerin qamtyǵan 6 baǵdar boıynsha, sondaı-aq 20 taý shyńyna ekspedısııalar uıymdastyryldy. Ekspedısııa qorytyndysy boıynsha jalpy qamtý shamamen 1,5 mln adamdy qurady.
