Aldymen bitken iske toqtar bolsaq, ótken jyly ekonomıkanyń barlyq salasynda ilgerileýshilik boldy. Osydan birneshe jyl buryn ákim esebi óndiristegi ken óndirý kórsetkishterimen bastalatyn. Bıylǵy ákim esebiniń basynda zalda otyrǵan jurtshylyqtyń qulaǵy oblys ekonomıkasyna salynǵan ınvestısııalardyń 13,3 prosentke, turǵyn úılerdi paıdalanýǵa berý 13,1 prosentke óskenin shaldy. Qazir ınvestısııasyz ekonomıka shabandaıdy, al áleýmettik salanyń kórsetkishin de, kóshin de durystaıtyn baspana ekenin aıan.
Oblystyń ónerkásip kásiporyndary 2018 jyly 871 mıllıard teńgeniń ónimin óndiripti. Taý-ken sektorynda 2011 jyldan sanaǵanda 15,5 prosent ósim qamtamasyz etilgen. Mys, temir kenderin, olardyń konsentranttaryn, boksıt, asbest óndirýdiń barlyǵy da ulǵaıtylǵan. Oblysta shıkizatty qaıta óńdeý salasynyń basyp ozǵanyna da biraz jyl boldy. Bul salada jergiliktendirý jáne qazaqstandyq qamtymyn ulǵaıtý jóninen júıeli jumys júrgizilip jatqan mashına jasaýda esep berilip otyrǵan jyly 13,0% ósim qamtamasyz etilgendigin atap ótýge bolady. 113,5 mıllıard teńgeniń ónimi óndirilgen. О́tken jyly Qostanaıdaǵy mashına jasaý zaýytynda 11766 jeńil avtomobıl qurastyryldy, ol bıyl onyń sanyn 25 myńnan asyrý kózdelip otyr. Qaıta óńdeý ónerkásibiniń arqasynda syrtqa un shyǵarý 60 myń tonnaǵa ulǵaıdy. Al jarma eksporttaý 7 esedeı, ósimdik maıy 6 esedeı, sút ónimderi 4, jumyrtqa 2,5 esedeı artty.
Oblysta 2015-2019 jyldarǵa baǵyttalǵan Indýstrııalandyrýdyń ekinshi besjyldyǵy kartasynda belgilengen ınvestjobalardy iske asyrý belsendilikpen júrgizildi. Bul ýaqyttishinde 5 myń adamǵa jumys beretin 24 joba iske asyrylýy tıis. О́tken 4 jyl ishinde 13 joba iske qosylǵan. Olarǵa tartylǵan ınvestısııa kólemi 35 mıllıard teńgeni quraıdy, 800-den astam jańa jumys orny ashyldy. 2018 jyly ınvestısııa kólemi 18,8 mıllıard teńge bolatyn 2 joba ómirge joldama aldy. Olardan 400 adam jumys ornyn tapty.
Aýyl sharýashylyǵynda esepti jyly alqaptardy ártaraptandyrý jalǵasyn tapty. Bıdaı alqaby 243 myń gektarǵa kemitildi. Onyń ornyna jem-shóptik, maıly, burshaq daqyldarynyń alqaby taǵy da ulǵaıdy. О́tken jyly 5,2 mıllıon tonna astyq jınaldy. Sonyń 2,2 mıllıon tonnasy eksportqa shyǵaryldy. Mal basynyń sany arty, sonyń ishinde iri qara 3,3, jylqy 7,8, ýaq mal 4, qus 4,2 prosentke ósti. Et, sút óndirý de artty.
Arhımed Muhambetov oblysta «Sıfrly Qazaqstan» baǵdarlamasy sheńberinde atqarylǵan jumystarǵa toqtaldy. Ásirese, aýyl sharýashylyǵyndaǵy sıfrlandyrý jumystary óz nátıjesin birden berdi.
«Qostanaı oblysy aýyl sharýashylyǵyn sıfrlandyrý boıynsha qanatqaqty óńir bolyp aıqyndaldy, onyń sheńberinde: «Aqyldy maı zaýyty» («Prombaza 7» JShS), «Aqyldy sút fermasy» («Olja Sadchıkovskoe» JShS), «Aqyldy et fermasy» («Terra» JShS), «Aqyldy qus fabrıkasy» («Jas-Qanat 2006» JShS) quryldy. Olardy iske asyrýdan ekonomıkalyq tıimdiligi tek bir jylda ǵana 1,5 mlrd. teńgeden asty» dedi Arhımed Begejanuly.
Áleýmettik salada baspana, aýyz sý, jol, gazben qamtý máseleleri qashan da ótkir turady. Qazirgi ýaqytta oblys halqynyń 59,5% ortalyqtandyrylǵan sýmen qamtamasyz etilgen, onyń 31 prosenti aýyldyq eldi meken bolyp sanalady, 8 eldi meken gazdandyryldy. «Nurly Jer» memlekettik turǵyn úı baǵdarlamasyn keń kólemde iske asyryp, 3,2 myń otbasy qonys toıyn toılady. О́tken jyly 11,9 mlrd. teńge ıgerildi, 299,3 myń sharshy metr turǵyn úı, sonyń ishinde jalpy aýdany 192,2 myń sharshy metr 39 kóp qabatty turǵyn úı paıdalanýǵa berildi. 2019 jyly 243,2 myń sharshy metr bolatyn 41 kóp qabaty turǵyn úı salynady.
Oblys ákimi osylaı, barlyq salada atqarylǵan isterdi baıandap ótken soń, oblys tuǵyndarynyń suraqtaryna jaýap berdi. Paıdalanýǵa endi ǵana berilgen, Jastar saraıynyń myńnan asa adam otyrǵan atshaptyrym zalynyń eki jaǵyna qoıylǵan mıkrofonǵa turǵandardyń kezegi uzyn-sonar boldy. Ákim otyzdan adam suraqqa jaýap berdi. Olardyń barlyǵy derlik áleýmettik máselelerdi qamtydy. Suraqtardyń arasynda aýdandar men qalalar ishindegi joldardyń nasharlyǵy, aýyz sý, kógildir otyn, baspana máseleleri jıi qaıtalandy. Munyń ózi alda áleýmettik salada atqarylar jumystyń az emestiginen habardar etti. Alys aýdandarǵa baratyndar úshin joldyń uzaqtyǵy eskerilip, zaldaǵylardyń ótinishi boıynsha suraqtar qysqartyldy. Alaıda Arhımed Begejanuly suraq berýge kezek kútip turǵyndardy qabyldaıtynyn aıtty.
Oblys ákiminiń mindetin atqarýshy Arhımed Muhambetovtyń ótken jylǵa jasaǵan esebin tyńdaǵandar atqarylǵan ıgi isterge rızashylyǵyn bildirdi. Jıynǵa Indýstrııa jáne ınfraqurylymdy damytý mınıstriniń mindetin atqarýshy J. Qasymbek qatysty.
