Tabys tabý maqsatynda beıresmı kásibin júrgizip otyrǵan, jaldamaly jumyskerlerdiń eńbegin paıdalanbaı, jeke tulǵalarǵa qyzmet kórsetetin nemese olardyń jumysyn atqaratyn, jeke qosalqy sharýashylyqtyń ózi óndirgen aýyl sharýashylyǵy ónimin jeke tulǵalarǵa ǵana ótkizetin jeke tulǵalar BJT tóleýshiler bolyp tanylady.
BJT tóleýshiler mynadaı múmkindikterdi ıe bolady: Birinshiden, mindetti medısınalyq saqtandyrý aıasynda barlyq medısınalyq qyzmet túrlerine qol jetkize alady. Medısınalyq uıymdy tańdaý quqyǵyna ıe bolady.
Ekinshiden, zeınetaqy júıesinde eńbek ótilin jınap, bazalyq jáne jınaqtalǵan komponentter esebinen tıisti kólemde zeınetaqy alatyn bolady. Bul oraıda BJT tóleýshilerdiń bazalyq zeınetaqy kólemi eńbek ótiline sáıkes esepteledi.
Úshinshiden, mindetti áleýmettik saqtandyrý júıesine qatysyp, eńbek etý qabiletinen, asyraýshysynan aıyrylý jaǵdaılaryna, júktilik jáne bosaný, jańa týǵan náresteni asyrap alý, 1 jasqa deıingi bala kútimi boıynsha áleýmettik tólemder alýǵa quqyly. BJT tóleý óz erkimen, qalaýymen júzege asyrylady. Bul júıege qatysý, qatyspaý quqyǵy azamattyń óz sheshimine baılanysty bolady. Bul oraıda BJT tólemegeni úshin qandaı da bir jaýapkershilikke tartý sharasy qarastyrylmaǵan.
BJT mólsheri respýblıkalyq jáne oblystyq mańyzy bar qala turǵyndary úshin - 1 aılyq eseptik kórsetkishti (2019 jyly 2 525 teńge), basqa eldi mekenderdiń turǵyndary úshin – aılyq eseptik kórsetkishtiń jartysyn (2019 jyly 1 262,5 teńge) quraıdy (turǵylyqty jerinde tirkelýine sáıkes).
BTJ tóleýshi salyqtyq organdaryna esep bermeıdi.
BTJ úlesi mynadaı:
- 10% - jeke tabys salyǵy;
- 20% - Memlekettik áleýmettik saqtandyrý qoryna áleýmettik aýdarymdar;
- 30% - Biryńǵaı jınaqtaýshy zeınetaqy qoryna zeınetaqy jarnasy;
- 40% - Áleýmettik medısınalyq saqtandyrý qoryna aýdarymdar.
BJT Memlekettik korporasııanyń esebine ekinshi deńgeıli bankter men Kazposhta bólimsheleri jáne termınaldary, sondaı-aq kaspi.kz mobıldik qosymshasy arqyly tóleýge bolady. BJT quramyna kiretin áleýmettik aýdarymdardy Memlekettik korporasııa tıisti áleýmettik qorlarǵa bólýdi derbes júzege asyrady.
Tólemderdiń merzimdiligi - aıyna bir ret, birden toqsan úshin, alty aıǵa, bir jylǵa aldyn-ala, árkimniń yńǵaıyna qaraı tóleýge bolady. Bul oraıda, BJT tólenetin árbir aıdy jeke kórsetý qajet.
