Kómekke muqtaj jandarǵa qol ushyn berý, qaıyrymdylyq kórsetip júrgen jandardy úlgi etýdi maqsat etetin osynaý ıgi shara bastalǵaly radıo ákimshiligine otyzdan astam ótinish kelip túsken. Qazaq radıosy Almaty stýdııasynyń jetekshisi Baqyt Jaǵyparulynyń aıtýynsha, qazaq dalasynyń ár únine qulaq túrip, el tynysyn darhan dalaǵa pash etip otyrǵan Qazaq radıosy áleýmettik máselelerdi ár kez nazardan tys qaldyrmaıdy. Osy baǵytta «Myń alǵys», «Zańger keńesi», «Densaýlyq», «Birinshi baılyq», t.b. baǵyttaǵy aıdarlar tyńdarmandy tolǵandyrǵan kóptegen saýaldardyń jaýabyn taýyp keledi.
Osy «Myń alǵys» sharasy aıasynda radıo ákimshiligi ótinishter ishinen iriktep muqtajǵa asa zárý azamattardy anyqtady. Olardyń qatarynda Almaty oblysy Raıymbek aýdany Shalkóde aýylynyń turǵyny 24 jastaǵy Bolat Tuńǵatarov bar.
On jyldan astam aýrýhanalardyń esigin tozdyrǵan Bolat Dıasuly sol jaq aıaǵynda óli et paıda boldy degen dıagnozben emdelip, birneshe otany basynan ótkizgen. Keıinnen qan aınalym júıesi buzylǵandyǵy anyqtalyp, sol jaq aıaǵyna 3 lıtrden astam qan jınalyp qalýy mazalaı bastaıdy. Bul dertten saýyǵý úshin Bolatqa Koreıa eline baryp emdelý qajet. Osy qaıyrymdylyq sharasy aıasynda Qurmanǵazy atyndaǵy Qazaq Memlekettik akademııalyq orkestriniń konsert zalynda elimizge tanymal óner ókilderi án salyp, qońyr kúıdiń kúmbirimen Bolattyń saýyǵyp ketýine júrekjardy tilekterin arnady. Jomart júrekterden jylý jınaǵan qaıyrymdylyq sharasy aldaǵy kúnderde Astana qalasynda da jalǵasyn tabatyn bolady.
Elvıra Serikqyzy,
«Eqemen Qazaqstan»
ALMATY
