Búgin Oral qalasynda «QazHol» JShS qurylys kompanııasy jeti balaly otbasyna aýmaǵy 90 sharshymetrlik sý jańa páter kiltin syıǵa tartyp, saýapty is jasady. Qaıyrymdylyq sharasy óńirde qolǵa alynǵan «Meıirimdi kóktem» aksııasy aıasynda ótip otyr.
Manar Búrkitova – «Altyn alqa» ıegeri. Sý jańa páterge oń aıaǵymen attap kirip, táttiden shashý shashqan ananyń júzi qýanyshtan bal-bul janyp tur.
- Búgingi sezimdi sózben aıtyp jetkizý múmkin emes. Bizdi, balalarymdy osylaı qýantqan qaıyrymdy azamat - «QazHol» kompanııasynyń quryltaıshysy Tımýr Ámınge, Oral qalasy men Batys Qazaqstan oblysy basshylaryna alǵysym sheksiz. Umytpańyzdar, bizdiń úıdiń 9 jany – barshamyz Sizderdiń amandyǵyńyz úshin, elimizdiń árqashan duǵa qylyp, tileýińizdi tilep júredi, - deıdi Manar Keńesqyzy.
Búrkitovter otbasynyń tuńǵyshy Bıbihabıba týǵaly beri búırek syrqatyna shaldyǵyp, arnaıy esepte turady. Únemi bilikti dárigerlik baqylaýdy qajet etkendikten olar Terekti aýdany Ańqaty aýylyndaǵy úıin tastap, oblys ortalyǵyna kóship kelýge májbúr bolǵan. Turaqty tirkeýdiń joqtyǵynan páter kezegine de kesh turypty. 2015 jyly 15 tamyzda páterge muqtaj otbasylardyń kezegine №6087 bolyp tirkelgen Búrkitovter kezegi búginde №4894 bolǵan.
- Oral qalasynda biz páter jaldamaǵan aýdan qalmaǵan shyǵar. Balalarymyz da mektepten mektepke aýysyp, sharshady. Páterin jalǵa berýshiler balasy kóp otbasyn unatpaıdy ǵoı. Osy kezge deıin bizdiń basymyzdan talaı jaǵdaı ótti. Biraq «beınet sońy zeınet» degen ras eken. Qudaıǵa shúkir, balalardyń báriniń de sabaǵy jaqsy. Uldarym sportpen aınalysady. Qyzdarym tigin tigedi, toqyma toqıdy, tamaq pisiredi. Endi bolashaǵymyz budan da jarqyn bolady dep senemin, - deıdi baqytty ana.
Manar Búrkitova – fızıka-matematıka pániniń muǵalimi, Qazaq Ulttyq ýnıversıtetin bitirgen joǵary bilimdi maman eken. Biraq qazir otbasy jaǵdaıyna baılanysty úı sharýasynda. Otaǵasy Erjan da aýyl sharýashylyǵy salasy boıynsha joǵary bilim alǵan. Alaıda Manardyń aıtýynsha, mamandyq boıynsha turaqty jumys istep, kóp balaly otbasyn asyraý múmkin emes. Tipti otbasy úshin eń qýanyshty sát – páter kiltin alǵan kezde de otaǵasy otbasymen bola almapty.
- Páter kiltin tústen keıin beredi degen soń qalaǵa jaqyn aýylǵa shyǵyp ketip edi. Úlgermeı qaldy, - deıdi jubaıy.
Aıta keteıik, Oral qalasynyń naq ortasyndaǵy 10 qabatty bul úı osydan bir apta buryn ǵana paıdalanýǵa berilgen sý jańa ǵımarat. Buryn bul jerde apatty úı bolǵan. Memleket-jekeshelik áriptestigi baǵdarlamasy aıasynda «QazHol» JShS bul orynǵa jańa úıdiń qurylysyn 1,5 jyl buryn salyp bastaǵan edi.
- Kompanııamyz 2006 jyldan beri Oral qalasynda 50-den asa kópqabatty úı salyp, paıdalanýǵa berdi. Qurmanǵazy kóshesindegi osy úıdi de bir apta buryn ǵana tapsyrdyq. Sol kezde Oral qalasy ákimdiginde asa páterge muqtaj bolyp júrgen osy otbasy týraly esitip, kompanııa atynan úsh bólmeli páterdi syıǵa berýge sheshim qabyldadyq. Bul páter úsh bólmeli, aýmaǵy 90 sharshymetr, barlyq jaǵdaıy jasalǵan. Qazir qujattaryn tirkeý ústindemiz, tolyǵymen Búrkitovter otbasyna jekemenshikke beriledi, - deıdi kompanııa merdigeri Tımýr Saǵıtjanuly.
Qazbek QUTTYMURATULY,
«Egemen Qazaqstan»
Batys Qazaqstan
Sýretti túsirgen Tımýr TOQMÁMBETOV
