Aımaq basshysynyń aıtýynsha, shıpajaı Katonqaraǵaı aýylyndaǵy №2 aýdandyq aýrýhana bazasynda ornalasady. Shıpajaıda Altaıdyń emdik shópterimen, qymyzben, batpaqpen emdeý kabınetteri ashylyp, kelýshilerge qyzmet kórsetpek. Aýrýhana ǵımaratynda halyqtyq medısına bólimin ashý da josparlanyp otyr.
Shıpajaı ashý máselesi 23 aqpanda D.Ahmetovtiń Katonqaraǵaı aýdanyna jasaǵan jumys sapary barysynda da talqylandy. Oblystyq Densaýlyq saqtaý basqarmasynyń basshysy Marat Shoranov ákimge shıpajaıdyń joba-josparyn tanystyrdy.
«Bul aýrýhana salynǵan kezde aýdandaǵy halyq sany, soǵan sáıkes medısınalyq mekemede tósek oryndarynyń sany da kóbirek bolǵan edi. Halyq jan-jaqqa kóshken kezde aýrýhanaǵa keletin kisiler de azaıyp, ǵımarattyń biraz bóligi bos tur. Naqtyraq aıtsaq, 9 myń sharshy metr nysannyń 3 myń sharshy metri paıdalanylmaı otyr. Biz shıpajaıdy osynda, ıaǵnı bos aýmaqqa ornalastyrmaq oıymyz bar. Shıpajaı ashýdaǵy maqsatymyz – eń áýeli Katonqaraǵaıdyń týrıstik áleýetin nyǵaıtý. Qazir bul aýdanǵa týrıster negizinen jaz kezinde ǵana keledi. Ári ketse eki-úsh aı. Zerdelep qaraǵanymyzda olardyń jeke menshik demalys bazalaryna baratynyna kóz jetkizdik. Atalǵan demalys bazalarynda bilikti medısına mamandary joq. Qan qysymyn, saraptamalaryn eshkim teksermeıdi.
Endi shıpajaıǵa kelýshilerdi bilikti mamandar qarap, rentgenge, ÝZI-ge túsirip, densaýlyqtaryn jiti tekseretin bolady. Katonqaraǵaıdyń týrıstik áleýeti joǵary. Máselen, Katonqaraǵaı ulttyq saıabaǵynda 18 týrıstik baǵyt bar. «Rahman qaınary» shıpajaıy óz aldyna. Jalpy, Katonqaraǵaı aýdanynyń týrısterdi jyl on eki aı qabyldaýǵa múmkindigi bar.
Qysta shańǵy tebýge bolady, jazda týrısterge Avstrııa jolyn nege kórsetpeske?! Shıpajaı aýdanda qosymsha jumys oryndaryn ashýǵa da múmkindik beredi. Biz ıppoterapııa, ıne terapııasy, qymyz terapııasyn damytýdy kózdep otyrmyz. Kerek bolsa, ózimizdiń mamandarymyzdy oqytamyz.
Qytaıdyń Altaı aýdanynda halyq medısınasyn jaqsy meńgergen mamandardy osynda tartyp nemese ózimizdiń mamandardy sol jaqqa jiberip, tájirıbe almasý da oıymyzda bar», - deıdi basqarma basshysy.
Azamat QASYM,
«Egemen Qazaqstan»
Shyǵys Qazaqstan oblysy
