«Memlekettik korporasııa – elimizdiń barlyq aımaǵyn qamtyǵan biregeı uıym. 18 myń jumysshy memlekettik qyzmetterdiń sapaly kórsetilýine óz úlesin qosyp júr. Olardyń árqaısysynyń ınnovasııalyq ıdeıasy men usynysy qashanda qoldaý tabady. Júzege asqan birneshe joba – osynyń dáleli», dep ótti Town hall sharasynyń ashylýy barysynda sóz sóılegen memlekettik korporasııanyń basqarma tóraǵasy Abylaıhan Ospanov.
Biregeı ıdeıa avtorlarynyń biri – Ánýar Qojahmetov. Ol qyzmetkerlerdiń emhanadan alatyn eńbekke ýaqytsha jaramsyzdyq paraǵyn onlaın formatqa kóshirýdi usyndy. «Birde dosym emhanadan alǵan syrqat paraǵyn joǵaltyp, qaıta alýǵa baratynyn aıtty. Al eger sol qujat úshin múlde emhanaǵa barýdyń qajeti bolmasa degenimde, bul burynnan qalyptasqan dúnıe ǵoı dep jaýap berdi. Biz burynnan qalǵan júıeni ózgertýden qoryqpaýymyz kerek. Sıfrly ómir – qaǵazbastylyqtan arylýǵa kómektesedi, qarapaıym qazaqstandyqtardyń ómirin jeńildetedi», dedi Á.Qojahmetov. Aıta keteıik, emhanada beriletin syrqat paraǵyn onlaın júıege aýystyrý usynysy Densaýlyq saqtaý mınıstrligi tarapynan qoldaý taýyp, búginde ony tehnıkalyq turǵyda júzege asyrý boıynsha jumystar júrgizilýde.
Kezdesýge Indonezııada ótken Azııa para oıyndarynyń júzýden 2 dúrkin jeńimpazy Erjan Sálimgereev te qatysty. Memlekettik korporasııaǵa 2018 jyly jumysqa ornalasqan sportshy bıylǵy «100 jańa esim» jobasynda jeńimpaz atanǵan. Toǵyz jasynda transformator býdkasyna toqqa túsip, bir aıaǵy men qolynan aıyrylǵan ol qaısar mineziniń arqasynda qıyndyqtardy eńserip, sportqa aralasyp, taǵdyr tálkegine moıymady. «Sport meniń ómirimdi túbegeıli ózgertti. Qıyndyqtarǵa tótep berip, maqsatqa jetý – basty mindetim. Osy jigerimmen memlekettik korporasııanyń damýyna da óz úlesimdi qosqym keledi», deıdi Erjan Sálimgereev.
Búginde, memlekettik korporasııada múmkindigi shekteýli 600-den asa qyzmetker jumys isteıdi. «Azamattarǵa arnalǵan úkimet» elimiz boıynsha múgedektigi bar azamattardy eń kóp jumyspen qamtyǵan birden-bir mekeme. «Olarǵa qoldaý kórsetip, deni saý azamattarmen bir qatarda jumys isteýge múmkindik berý – adamı resýrstardy baǵalaıtynymyzdyń kórinisi», deıdi korporasııadaǵylar.
Town hall formatynda ótken sharaǵa memlekettik korporasııanyń basqarma músheleri, óńirlik fılıal basshylary, Astana fılıalynyń qyzmetkerleri, jıyny 500 adam qatysty. Basqosý barysynda korporatıvtik mádenıet dıagnostıkasy jobasynyń qorytyndysy aıtylyp, sıfrly mádenıetti qalyptastyrýǵa negiz bolatyn korporatıvti qundylyqtar aıqyndaldy. Sharanyń maqsaty – qyzmetkerlerdi kompanııanyń kúndelikti jumysyna belsendi atsalysýǵa yntalandyrý, servıstik mádenıet deńgeıin joǵarylatýǵa jumyldyrý.
«Egemen-aqparat»
