«Qaztemirtrans» AQ kompanııasy dırektorynyń orynbasary Abzal Salyqbaev júk vagondarymen qamtý máselesine qatysty esebinde 2018 jyly Soltústik Qazaqstan men Aqmola oblystarynan 40830 vagonǵa tıelgen 2 mıllıon 749 myń tonna astyq tasymaldanǵanyn, 116700 tonna undy jetkizý úshin 1896 vagon jalǵa berilgenin shattana aıtyp, sóziniń aıaǵyn rezervte 14 myńnan astam vagon bar degen sekildi kóterińki leppen aıaqtaǵanymen, kásipkerlerdiń atqarylǵan isterden góri tolǵaqty problemalardy sheshýdiń utqyr joldaryn kútken úmiti aqtalmady. Bıyl eki oblys boıynsha 700 myń tonna júk tasymaldanǵanyna qaramastan taýar óndirýshiler deldal-operator «Eýrotransgrýpp» JShS-nyń qyzmetine júginýge májbúr.
«SevEsılZerno» JShS-nyń kommersııalyq dırektory Taısııa Kolegova deldalsyz jumys júrgizý jaıynan arylý máselesin taǵy da kóterdi. «Deldal-operatorǵa táýeldilik saldarynan ónim baǵasy qymbat, ózindik quny joǵary. Mysaly, bir vagondy jaldaý 771 myń teńgeni qurasa, astyq júk tıeýshige jetkenshe 810 myń teńgege sharyqtap ketedi. Bıýrokrattyq kedergiler básekelestikti tejep otyr», dedi ol.
Eski jáne isten shyqqan vagondar jaıy da alańdatady. Un, bıdaı tasymalyna paıdalanylatyn vagondardyń 10 paıyzynyń tozyǵy jetken.
«Eýrotransgrýpp» seriktestiginiń ókilderi jumǵan aýyzdaryn ashpaýlaryna qaraǵanda jaǵdaıdyń ózgermeýine múddeli sekildi. Ony ekinshi márte ótken kelissóz barysynda baıqatyp aldy. Dıqandarǵa deldaldyq qyzmettiń jańartylǵan, ońtaıly baǵasyn usynýdyń ornyna jeke kelisemiz degen shyǵaryp salma jaýappen ǵana shekteldi. «Qaztemirtrans» kompanııasyna tikeleı kelisimshart jasaý múmkindikterin qarastyrý bolmasa, operator tańdaý quqyǵyn ıelený týraly usynys aıtylǵanymen basshylyq tarapynan tııanaqty jaýap berilmedi.
Temir joldaǵy túıtkildi túıinder qashan taratylyp, núkte qoıylary belgisiz.
О́mir ESQALI,
«Egemen Qazaqstan»
Soltústik Qazaqstan oblysy
