Oqıǵa ornyna dereý 4 órt sóndirýshisi bar bir bólimshe jiberiledi. Úı ıesi sol jerde bolǵan jáne úıde gaz ballondary bar ekenin eskertedi. О́rttiń shyǵýyna gaz ballonyn aýystyrý kezinde qospanyń tutanýy sebep bolǵan. Sondyqtan jedel basqarý ortalyǵyna jarylys qaýpi múmkin ekendigi habarlanady. Bir sáttik qana múmkindik. Osy sátte órt sóndirýshiler kishi serjant A.Kolokolnıkov jáne qatardaǵy jaýynger D.Makarov úıden syıymdylyǵy 27 lıtrlik 6 ballon men 50 lıtrlik 1 gaz ballonyn syrtqa shyǵaryp úlgeredi. О́rt sóndirýshileriniń batyldyǵy men birlesken jumys barysynda órt sóndirildi. Jarylysqa tosqaýyl qoıyldy. Kórshi úılerge jáne sharýashylyq qurylystarǵa taraýynyń aldyn aldy.
Departamenttiń órt qaýipsizdigin baqylaý bóliminiń habarynsha, bul kúnderi óńirdegi qalalar, aýyldarda, aýdan ortalyqtarynda órt qaýpinen saqtanýǵa baǵyttalǵan profılaktıkalyq is-sharalar jalǵasýda. Oblys boıynsha reıdterge barlyǵy 244 adam qatysty. Úı-úıdi aralap shyǵýmen peshpen jylytatyn jeke turǵyn úı sektorynyń 3938-den astam otbasy qamtyldy. Reıd barysynda óńir turǵyndarymen kezdesip, peshti durys paıdalaný jáne tunshyqtyrǵysh gazben ýlanýdan qalaı saqtaný kerektigi jóninde eskertedi. Sondaı-aq turmysy tómen jáne kóp balaly otbasylardyń úılerine arnaıy belgi bergish qurylǵy datchıkter ornatýda.
О́rt qaýipsizdigin baqylaý bóliminiń ujymy Maıqaıyń kentindegi órt sóndirý kezinde kishi serjant Artem Kolokolnıkov pen Dmıtrıı Makarov bólimsheniń qoǵamdyq ómirine, sondaı-aq garnızonda ótkiziletin barlyq sporttyq is-sharalarǵa belsendi qatysatynyn aıtady.
Jýyrda oryn alǵan órt oqıǵasynda batyldyq kórsetken beıbit kúnniń batyrlary – órt sóndirýshiler marapattaldy.
Farıda BYQAI,
«Egemen Qazaqstan»
Pavlodar oblysy
