Jıyndy QHA Tóraǵasynyń orynbasary – Hatshylyq meńgerýshisi Leonıd Prokopenko men akademııanyń strategııalyq damý, zertteý jumysy jáne halyqaralyq áriptestik jónindegi vıse-rektory Aıgúl Kósherbaeva ashty. Vıse-rektor óz sózinde mundaı is-sharanyń mańyzdylyǵyna toqtaldy.
«Jahandaný dáýirinde memleket bilim berý, otbasy jáne dinniń qýatty ınstıtýttary minez-qulyq, ómir súrý normasy men qarym-qatynastardyń jańa úlgilerin jasaýda, qundylyqtar júıesin qurýda. Osy oraıda jańa ólshemde bılik organdary men azamattyq qoǵamnyń ózara baılanysynyń, sondaı-aq qoǵamdyq sanany jańǵyrtý jaǵdaıynda jalpyulttyq birlik pen biregeılikti qalyptastyrý boıynsha mindetterdi iske asyrýdyń tyń tetikterin jasaýǵa kómektesetin jańa bilim qajet», dedi ol.
Semınarda Qazaqstan halqy Assambleıasy, Ulttyq ekonomıka mınıstrliginiń ókilderi, otandyq sarapshylar jáne akademııanyń oqytýshylary dáris oqydy. Máselen, Prezıdent Ákimshiligi Qazaqstan halqy Assambleıasy hatshylyǵy meńgerýshisiniń orynbasary Názıpa Shanaı sıfrlandyrý jáne qazaqstandyq biregeılikti nyǵaıtý máselelerine toqtalsa, ınternettegi quqyqtyq qaýipsizdik máseleleri týraly «Quqyqtyq medıa ortalyq» QQ medıa-zańgeri Gúlmıra Birjanova baıandady.
Al Memlekettik basqarý akademııasy Ortalyq Azııa óńirindegi etnosaralyq jáne konfessııaaralyq qatynastardy zertteý ortalyǵy basshysynyń orynbasary Dastan Kósherbaev Ortalyq Azııadaǵy etnoáleýmettik úderister jáne olardyń Qazaqstanǵa yqpal etý máselelerin qozǵady.
Sonymen qatar QHA týraly jańa zańnama sheńberinde bılik organdary men azamattyq qoǵamnyń ózara baılanysynyń tıimdi tetikteri, óńirlik táýekelder klassıfıkatory men etnodemografııalyq pasporttardyń is júzinde qoldanylýy jáne basqa da máseleler talqylandy.
Joldybaı BAZAR,
«Egemen Qazaqstan»
