Otyrysta «Densaýlyq» baǵdarlamasynyń oryndalýy sóz boldy. 2018 dári-dármek alý prosesi ortalyqtandyryldy. Byltyr bul baǵytqa 4,4 mlrd teńge jumsalsa, bıyl soma 5,6 mlrd teńgege deıin ósti. Tegin dárimen 80 myń adam qamtamasyz etildi, 2017 jylmen salystyrǵanda 6 paıyzǵa kóp. Dárilerdiń baǵasy bıliktiń qatań baqylaýynda.
«Dárihanalarda ár túrli baǵalardy kóremiz. Baǵanyń ósýine jol bermeý kerek. Kóp kásipkerler dáriniń joqtyǵyn paıdalanyp, baǵany sharyqtatyp jiberedi. Únemi monıtorıng jasaý kerek», — dedi Qumar Aqsaqalov.
Medısınalyq kadrlarmen qamtamasyz etý máselesi de qaraldy. Qazir oblysta 1434 dáriger, 5 myń medısınalyq qyzmetkeri bar. 2018 jyly 58 jas maman keldi, onyń 31-i aýylǵa jumysqa turdy. О́ńirge dárigerlerdiń kelýine jaǵdaı jasaý maqsatynda 1,5 mln teńge kóterme aqy beriledi. Byltyr mundaı kómekti 40 dáriger aldy. Oblys ákiminiń aıtýynsha, bul jumysty jalǵastyrý qajet.
«Aýylǵa barǵan dárigerlerge 1,5 mln teńge kóterme aqy beremiz. Alaıda, kóp aýdandar bul múmkindikti paıdalana almady. Aqqaıyń aýdany bárine úlgi bola alady. Byltyr aýdan 7 mamandy qabyldap, dáriger tapshylyǵyn joıdy. Bıyl bul tájirıbeni jalǵastyramyz, ásirese tapshy dárigerlerdi shaqyramyz», — dedi Qumar Aqsaqalov.
Bıyl oblysta medısına qondyrǵylaryn satyp alýǵa úsh ese kóp qarjy jumsalmaq. Sondyqtan, qaladaǵy keıbir qondyrǵylar aýdandarǵa jóneltilmek. О́ńir basshysynyń aıtýynsha, aýdandarda tirek aýrýhanalaryn ashý kerek.
«Tirek aýrýhanalaryn qurý kerek, bizde Taıynsha aýdandyq aýrýhanasy boıynsha jospar bar. Bul mekemeni aýdanaralyq qylyp, onda Aıyrtaý, Aqjar jáne Ýálıhanov aýdandarynyń turǵyndary emdele alady. MRT, angıograf, rentgen apparatyn jetkizemiz», — dedi Qumar Aqsaqalov.
