Bul jobaǵa elimizdiń belsendi degen kez kelgen azamaty qatysa alady. Joba shartyna sáıkes turaqty jumysy joq ári tabysy kún kóris deńgeıinen tómen respýblıkanyń 14-29 jas aralyǵyndaǵy, mektep oqýshylarynan ózge turǵyndarynyń qatysý múmkindigi bar. Jobanyń basty ereksheligi - joǵary oqý oryndaryn támamdaǵan jastarǵa aı saıyn 60 000 teńge, basqa qatysýshylar úshin 40 000 teńge shákirtaqy taǵaıyndalǵan.
Jobany basqarý tobynyń úılestirýshisi Gúlmıra Eskendirovanyń aıtýynsha, grant sommasy bir mıllıon teńge. Bıylǵy jyly Jastar korpýsyn damytý jobasy Aqmola, Atyraý, Batys Qazaqstan, Mańǵystaý oblystarymen qatar Almaty jáne Astana qalalaryn qamtıtyn bolady.
Al joba tarıhyna sál sheginis jasaıtyn bolsaq, Almaty, Qaraǵandy, Pavlodar jáne Ońtústik Qazaqstan oblystarynda 2017 jyly 589 áleýmettik joba júzege asyp, 2000-nan astam jas kásipker óz isin bastaǵan. Al 2018 jyly jobaǵa Aqtóbe, Shyǵys Qazaqstan, Jambyl, Soltústik Qazaqstan, Qyzylorda jáne Qostanaı oblystary boıynsha 3508 jas kásipker qatysyp, 1027 joba sátti júzege asty. Jobany júzege asyrý barysynda 250 bilim berý kýrstary, aýyldardy damytýǵa baǵyttalǵan 200-den astam joba, 170 sporttyq seksııa, 125 shyǵarmashylyq úıirmeler, 61 naýbaıhana men kondıterlik seh, 86 tigin sheberhanasy ashylǵan.
Jastar korpýsyn damytý jobasyn iske asyratyn úılestirý agenttigi tarapynan jobaǵa qatysýshy jastar arnaıy taǵylymdamadan ótetin bolady. Jeke kásip ashýǵa usynys bildirgen jastar jobalaryn ujymdyq negizde qorǵaıdy. Jobalar úsh kezeń boıynsha irikteledi. Tolyq aqparatty Almaty qalasy boıynsha Aımaqtyq úılestirýshiden jáne zhasproject.kz saıtynan alýǵa bolady.
Elvıra Serikqyzy,
«Egemen Qazaqstan»
ALMATY
