Oqý-jattyǵý shtabynyń jetekshisi, Tótenshe jaǵdaılar jónindegi komıtet tóraǵasynyń orynbasary Marat Kúldikov óz sózinde kóktemgi sý tasqyny kezeńinde tótenshe jaǵdaılardy joıýdyń, óńiraralyq is-qımyldardy úılestirýdiń, azamattyq qorǵaý memlekettik júıesin tıimdi paıdalanýdyń mańyzyn atap kórsetti. Oqý-jattyǵýdy basqarý shtaby Petropavl qalasynda ornalasqan.
«Kóktem-2019» respýblıkalyq komandalyq-shtabtyq oqý-jattyǵý jıynynyń alǵashqy kúni qutqarýshylar kásibı daıarlyqtary boıynsha synǵa tústi. Oqý-jattyǵý oblys ortalyǵyndaǵy Oıqala, Zarechnyı shaǵynaýdandary men Jumysshy kentinde ótkizilip, shara barysynda 233 qutqarýshy men 46 arnaıy tehnıkanyń tótenshe jaǵdaılar kezindegi ázirligi tekserildi. Ortalyq jáne jergilikti atqarýshy organdardyń ózara is-qımyldary ján apatty jaǵdaılar jóninde jurtshylyqty der kezinde qulaqtandyrý, qaýipsiz aımaqtarǵa alyp shyǵý múmkindikteri saralandy. Sý tasqynyna qarsy is-sharalarda onyń aldyn alý joldary áldeqaıda tıimdi ekeni atap kórsetildi. Qardy jınaý jáne shyǵarý, aryqtardy tazalaý, ınertti materıaldarmen qamtamasyz etý jaǵdaıy barynsha eskerildi. Azamattyq qorǵaý qurylymdary kúshteriniń jáne halyqtyń sý tasqyny kezeńinde is-qımyldary boıynsha arnaıy-taktıkalyq jattyǵýlar ótkizý, sondaı-aq azamattyq qorǵaýdyń memlekettik júıesiniń aýmaqtyq jáne salalyq kishi júıeleriniń qyzmetin der kezinde joǵarǵy ázirlik rejımine keltirý máselelerine erekshe mán berildi.
Oqý-jattyǵý jalǵasýda. Qutqarýshylar Mamlıýt aýdanynda óz ázirlikterin pysyqtaıtyn bolady.
О́mir ESQALI,
«Egemen Qazaqstan»
Soltústik Qazaqstan oblysy
