Búgin Baqyt Sultanovtyń tóraǵalyǵymen Astana qalasy ákimdiginiń kezekti otyrysy bolyp ótti. Jıyn barysynda jaqynda jasóspirimniń qaladaǵy qudyqtardyń birinde qaza bolýyna oraı ýákiletti tulǵalardyń jaýapkershiligi týraly sóz boldy.
«О́kinishke qaraı, 19 aqpanda taǵy bir qaıǵyly oqıǵa boldy. 13 jasar jasóspirim qaladaǵy ashyq qudyqtyń birine qulap, qaza tapty. Tótenshe jaǵdaı ótkendegideı Almaty aýdanynyń aýmaǵynda oryn aldy Ashyq qudyq «Astana Sý Arnasy» memlekettik kásipornyna tıesili. Osydan birneshe aı buryn jasósipirim qyz dál osyndaı jaǵdaıda qaıtys bolǵanda, aýdan ákimderine qatań sógis jarııalaýmen ǵana shektelip edik. Bul jazalaý túri sizderge az sııaqty bolyp otyr! Endeshe, Almaty aýdanynyń ákimi Ádilbek Sársembaevqa qatań sógis jarııalaımyn», – dedi qala ákimi.
Otyn-energetıka kesheni jáne kommýnaldyq sharýashylyq basqarmasy basshysynyń orynbasary Igor Alekseevke, «Astana Sý Arnasy» MKK dırektory Tabıǵat Zeınýlqabdenge, káriz qyzmetiniń basshysy Qýanysh Sultanbaev pen Almaty aýdany káriz ýchaskesiniń basshysy Vladımır Vlasenkoǵa osyndaı jaza belgilendi. Qalalyq Qoǵamdyq densaýlyq saqtaý basqarmasy basshysynyń m.a. Álııa Rústemova da elorda ákiminen sógis aldy. Qudyqtar qaqpaǵy urlyǵynyń aldyn alý maqsatynda qalalyq ákimdik kóptegen jumys atqaryp jatyr. Qaladaǵy barlyq qudyqtyń tizimi qaıta jasalýda. Jeliler jobalarynda qaqpaqtardy polımerlik materıaldan, sondaı-aq arnaıy torlardy polıetılennen jasaý kózdelgen.
«Tor qudyq qaqpaǵy urlanǵan kúnniń ózinde qudyqqa adamnyń, jan-janýardyń taǵy da basqa zattardyń túsip ketýinen saqtaıdy. Qazir 6 myń qudyqqa tor ornatylǵan», – dep habarlady OEKKShB-da. Odan bólek, qudyqtar qaqpaǵyn urlaýdy boldyrmaý jáne oǵan adamdardyń túsip ketýiniń aldyn alý maqsatynda jańa jobalarda qaqpaqtardy kompozıttik materıaldardan jasap ornatý kózdelgen.
Qazirgi zamanǵy ónerkásip talaptary eskerile otyryp jasalatyn polımerli-qumdy buıymdar qaýipsizdik tehnıkasy men ekologııalyq normalardyń barlyq talaptaryna jaýap beredi. Jasyryn baılanys jelilerin tóseý kezinde ońaı qol jetkizýdi qamtamasyz etedi. Eń bastysy, ol metall emes, ony temir qabyldaýshylarǵa tapsyra almaısyz. Sol sebepti urlyqshylarǵa ony qoldy qylýdyń paıdasy bolmaıdy. Sonymen qatar, Astana qalasy Polısııa departamenti qudyq qaqpaqtary urlyǵynyń aldyn alý maqsatynda júıeli túrde tekseris, eskertý, túsindirý jumystaryn júrgizedi. Baqyt Sultanov 19 aqpandaǵy №2 perınataldyq ortalyqta bolǵan jan túrshigerlik oqıǵany tilge tıek etti. Ortalyqtyń bosaný bóliminde kelinshek dárigerlerdiń kómeginsiz edende ózi bosanyp qaldy.
«Abyroı bolǵanda bala men ananyń densaýlyǵyna zııan kelmegen. Biraq bul jaǵdaı erekshe baqylaýǵa alynýy tıis dep oılaımyn. Mundaı oqıǵalar júıesizdiktiń saldarynan oryn alǵan», – dedi osyǵan baılanysty B.Sultanov.
Sonymen qatar ol 2018 jyly bosaný kezinde segiz áıeldiń qaıtys bolǵanyn, oqıǵalar sanynyń 2017 jylǵy kórsetkishten tórt ese joǵary ekendigin alǵa tartty.
«Bizdiń densaýlyq saqtaý júıesinde mundaı beı-bereketsizdik nelikten oryn alyp jatyr?» – dep surady A.Rústemovadan qala ákimi.
«Mundaı jaǵdaıdyń bolǵany ras. Bosanýshy 18 aqpanda keldi. 19 aqpanda onyń tolǵaǵy kúsheıe tústi. Saǵat 12-de bólimshe meńgerýshisi ony qaraǵanda, ol bosaný bólimshesinde bolǵan. Ol jyldam bosandy. Bul kúni bólimshede 37 áıel týdy. Osy ýaqytta úsh akýsher tórt áıeldi bosandyryp jatqan bolatyn. Sondaı-aq bólimde kúrdeli operasııa jasalyp jatty. Oǵan dárigerlerimizdiń barlyǵy jumyldyrylǵan bolatyn. Ne desek te, bul jaǵdaıda olqylyqtar bar», – dedi A.Rústemova.
«Demek, tıisti kúsh salý kerek. Sizge resmı túrde eskertý jasap otyrmyn. Barlyq júıe boıynsha sharalar qoldanyńyz. Bul barlyq basqa medısınalyq mekemeler úshin belgi bolýy tıis. Sondaı-aq barlyq densaýlyq saqtaý nysandarynyń jumysyna monıtorıng júrgizip, shtattan tys barlyq jaǵdaılar boıynsha naqty is-qımyl algorıtmin pysyqtańyz», – dedi B.Sultanov.
