Osy kezdesý barysynda atalmysh qaýymdastyqtyń menedjeri Qaırat Tileýbaev: «Biz qazirgi kezde zańgerlik qyzmet qurý boıynsha jumystar júrgizip, osy iske keshendi medısınalyq topty tarttyq. Quramynda 20 federasııasy bar qaýymdastyqtyń basym baǵyty – balalar sporty men buqaralyq. Qolda bar málimetterge súıensek, elimizde jekpe-jek túrlerimen 180 myńnan astam adam aınalysady. Biz kópshilik nazaryn olımpıadalyq emes sport túrlerine aýdarýǵa tıispiz», – dep atap ótti.
– Jýyrda biz MMA aralas jekpe-jekten Qazaqstan chempıonatyn ótkizdik, – deıdi Aralas jaýyngerlik jekpe-jek óneriniń birlesken federasııasynyń bas dırektory Ýálıhan Ten. – Bul jarysta 230 sportshy kúsh synasty. Endi qaýymdastyqtyń júrgizip otyrǵan osy jumysynyń oń nátıjesiniń arqasynda kóptegen sportshylar úshin kásipqoılar arasynda óner kórsetýge múmkindik týady.
Áriptesiniń bul sózin Mýaıtaı federasııasynyń prezıdenti Elhan Amanquov ta qoldap otyr. «Qazaqta «Eń qoshqardyń basy bir qazanǵa syımaıdy» degen maqal bar. Kóptegen federasııalar entýzıastardyń ǵana arqasynda jumys istep keledi. Al erteńgi kúni bizder ketsek, ne bolmaq? Balalar men jas jetkinshekter úılesimdi túrde damýy kerek. Al dene shynyqtyrýsyz bul múmkin emes. Barlyǵymyz da sport arqyly óstik. Bul salanyń qyr-syry, máni men mańyzyn jaqsy bilemiz. Eger barlyǵymyz bir ústeldiń basynda jınalsaq, qabyldanǵan sheshimderimiz de ońdy bolady», – deıdi ol.
Bizge ár jerlerde osy iske aralasý mindeti júkteli otyr, – deıdi Almaty qalasy boıynsha Ulttyq qaýipsizdik Departmentiniń tóraǵasy Serik Júnisov. – Bul jumys ashyq jáne jarııa túrde júrgizilýge tıis. Bizdiń lınııa boıynsha baqylaý isi júzege asyrylady.
2021 jyly Qazaqstanda «Sport-Akkord» Dúnıejúzilik oıyndary ótedi. Qazirgi kezde Halyqaralyq uıymdar jekpe-jek túrlerinen stýdentter arasynda osy sekildi jarystar ótkizý jobasy boıynsha jumystar júrgizýde. Aldaǵy ýaqytta atqarylatyn sharýalar shash etekten.
Ǵalym SÚLEIMEN,
«Egemen Qazaqstan»
