Jaqynda О́skemende ótken oblys ákimi Danıal Ahmetovtiń halyqqa esep berý kezdesýinde Qazaqstan Jazýshylar Odaǵy Semeı qalalyq fılıalynyń dırektory Mereı Qart: «Áýejaı el men eldiń, jer men jerdiń arasyn jalǵaıtyn úlken kúshke aınaldy.
Semeı qalasynyń áýejaıy kúrdeli jóndeýden ótkizilgeni úshin qala turǵyndarynyń atynan alǵys aıtamyz. Álemdik tájirıbeni alyp qarar bolsaq, Fransııadaǵy áýejaı Sharl de Golldiń atynda, Astanadaǵy áýejaı Elbasynyń atynda.
Endi osy Semeıdegi áýejaıǵa Semeıden shyqqan uly tulǵalardyń esimin berýge qalaı qaraısyz?» dep ákimge suraq qoıǵan bolatyn. Bul saýalǵa aımaq basshysy «Semeıde Uly Abaıdyń aty berilgen nysandar jeterlik. Abaı mýzeıi, Abaı teatry, Abaı kitaphanasy bar. Onyń ústine «Abaı Arena» mádenı-sporttyq kesheni salynyp jatyr. Shákárimniń atynda da kóshe, joǵary oqý orny bar. Sondyqtan áýejaıǵa at berýdi qoǵam bolyp aqyldasýymyz qajet. Usynys óte oryndy. Bul rette biz jerlesimiz, uly jazýshy Muhtar Áýezovtiń esimine nazar aýdarýymyz kerek sııaqty» dep jaýap bergen-di.
Azamat QASYM,
«Egemen Qazaqstan»
О́SKEMEN
