Elbasy tapsyrmasymen Túrkistan oblysy máslıhatynyń kezekten tys sessııasyna qatysqan Premer-Mınıstr Asqar Mamın Memleket basshysynyń О́.Shókeevtiń kandıdatýrasyn oblys ákimi laýazymyna usyný týraly hatyn oqyp berdi. Depýtattar Prezıdent usynǵan kandıdatýrany biraýyzdan qoldady.
Premer-Mınıstr Túrkistan oblysynyń aktıvimen ótken kezdesýde J. Túımebaevqa atqarǵan jumysy úshin alǵys bildirdi. Túrkistan oblysynyń alǵashqy ákimi retinde oblys ortalyǵyn Túrkistan qalasyna kóshirý, jańa oblystyń ákimshilik-aýmaqtyq qurylymyn uıymdastyrý, kóshi-qon máselelerin, jańa qalanyń aýqymdy qurylys jumystaryn uıymdastyrý boıynsha birqatar jumystardy atqarǵanyn atap ótti.
Sondaı-aq, A. Mamın oblystyń jańa ákimin tanystyra otyryp, О́. Shókeevtiń Qostanaı, Ońtústik Qazaqstan oblystarynyń jáne Astana qalasynyń ákimi retinde atalǵan óńirlerdiń áleýmettik-ekonomıkalyq damýyna úlken úles qosqanyn aıtty. Premer-Mınıstrdiń orynbasary — aýyl sharýashylyǵy mınıstri retinde ózin isker, tájirıbeli basshy jáne joǵary deńgeıdegi uıymdastyrýshy retinde kórsetkenin, kásibı biliktiligi men jaýapkershiligi áleýmettik mańyzdy mindetterdi sapaly oryndap, Memleket basshysynyń senimin aqtaýǵa múmkindik beretinin jetkizdi. «Túrkistan oblysynyń damýy Elbasynyń erekshe nazarynda. Memleket basshysynyń bastamasymen qasıetti Túrkistan qalasynda jańa úlken qurylys bastaldy. Jergilikti atqarýshy organdar aldynda jańa qalanyń jańǵyrýyn ýaqytyly qamtamasyz etip, búkil túrki áleminiń mádenı-rýhanı astanasy retinde órkendetý jáne ony qarqyndy damytý, jańa jumys oryndaryn ashý, azamattardyń áleýmettik jaǵdaıyn jaqsartý boıynsha úlken jaýapkershilikti júkteıtin mindetter qoıylyp otyr», - dedi A. Mamın. О́z kezeginde О́mirzaq Shókeev Memleket basshysynyń ózine Túrkistannyń týmasy retinde senim bildirigenine alǵysyn aıta kele, perzenttik paryzyn oryndaý, jańa oblystyń ósip-órkendeýi jolynda kúsh-jigerin aıamaıtynyn jetkizdi. Al Janseıit Túımebaev Elbasy qandaı da bir senip tapsyrǵan jumysty minsiz atqarýǵa tyrysatynyn bildirdi.
Ǵalymjan ELShIBAI,
«Egemen Qazaqstan»
Túrkistan oblysy
