Baıqaýshylardyń qorytyndysy boıynsha saılaý zańǵa sáıkes ashyq, básekelestik turǵysynda boldy. Moldova Ortalyq saılaý komıssııasynyń daýys berýge ázirligi men ony ótkizý jónindegi kásibı jumysy erekshe atap ótildi. Barlyǵy 2143 saılaý ýchaskesi, onyń ishinde 123-i shetelde uıymdastyryldy.
TMD Parlamentaralyq Assambleıasy baıqaýshylar tobynyń úılestirýshisi, Qazaqstan Respýblıkasy Parlamenti Senaty tóraǵasynyń orynbasary Bektas Beknazarovtyń aıtýynsha, daýys berý kezinde TMD PAA baıqaýshylary Kıshınevte, Belsyde, Gagaýzııa avtonomııalyq aýmaqtyq qurylymy men eldiń alty óńirindegi 100-ge jýyq saılaý ýchaskesinde boldy.
«Biz parlamenttik saılaý Moldova Respýblıkasynyń saılaý zańnamasy men halyqaralyq saılaý standarttaryna sáıkes ótti dep sanaımyz. Daýys bergen kúni biz Moldova Respýblıkasynyń buqaralyq aqparat quraldary saılaý naýqanynyń bar aýqymyn belsendi túrde qamtyǵanyna kýá boldyq. Saılaý ýchaskelerine barǵan kezde bizdiń baıqaýshylar jekelegen eskertýler jasady, biraq olar óte sırek boldy. Bizdiń pikirimizshe, olar daýys berýdiń nátıjelerine áser etpeıdi», - dedi Bektas Beknazarov.
Úılestirýshiniń aıtýy boıynsha, Ázerbaıjan, Armenııa, Belarýs, Qazaqstan, Qyrǵyzstan, Reseı jáne Tájikstan ókilderinen turatyn TMD PAA-nyń barlyq baıqaýshylarynan quralǵan monıtorıng tobynyń qorytyndysy biraýyzdan maquldanyp, qol qoıyldy.
