2016 jyly Reseıdiń Sankt-Peterbýrg qalasynda ótken bokstan jastar arasyndaǵy álem chempıonatynyń jeńimpazy, el birinshiliginiń birneshe dúrkin chempıony, 2017 jylǵy Qazaqstan Prezıdenti kýbogynyń ıegeri jáne kásipqoı bokstaǵy WBC Youth World Super Welterweight (Jastar arasyndaǵy álem chempıony) Jastar jyly aıasynda otandyq týrızmdi el ishinde jáne shetelde nasıhattaıtyn bolady.
Qazaqstandyq bokstyń jańa juldyzyna atalmysh sertıfıkat Astana qalasynda ornalasqan «BEIBARYS» demalys bazasynda tabystaldy. Bul jerde jas sportshy atpen, qarda júrgish kólikpen, ıt jegilgen arbamen serýendeý, sondaı-aq asa tanymal Counter Strike kompıýterlik oıynyndaǵy dál «de dust 2» kartasynyń kóshirmesi bolatyn polıgonda peıntbol oınaý jáne basqa belsendi demalys múmkindikterimen tanysty.
«Byltyr biz tanymal otandastarymyz arqyly elimizdiń týrıstik áleýetin nasıhattaý maqsatynda Qazaqstan týrızmi elshileri baǵdarlamasyn iske qosqan bolatynbyz. Ondaǵy maqsat – elimizge jáne shetelge tanymal tulǵalar arqyly otandyq týrızmdi nasıhattaý men onyń damýyna úles qosý. Bıyl Jastar jylynyń ashylý saltanaty kezinde Elbasy jastar týrıstik klýbtaryn jańǵyrtý qajettiligin erekshe atap ótti. Sondyqtan jas boksshy, elimizdiń kók týyn dúnıe júzine abyroımen kóterip júrgen Sadrıddın Ahmedovpen tolyqtyrýdy jón kórdik. Sertıfıkat tabystaý orny retinde demalys bazasyn tańdaý kezdeısoq emes, sebebi Sadrıddın elshi retinde belsendi týrızm túrlerin jastar arasynda nasıhattaıtyn bolady», dedi «Kazakh Tourism» UK» AQ basshysy Rashıd Kúzembaev.
Al Sadrıddın Ahmedov týrızm elshisi ataný ózi úshin kútpegen jańalyq jáne úlken jaýapkershilik ekenin aıtady. Sondaı-aq ol endigi ýaqytta sportpen qatar elimizdiń týrızm salasynyń odan ári damyp, jaqsarýyna jaýaptymyn deıdi. «Boksshy retindegi basty maqsatym – Kók týymyzdy bıik ustap júrý bolsa, elshi retindegi maqsatym – Qazaqstan týrızmin damytýǵa sál de bolsa óz úlesimdi qosý», dedi Sadrıddın Ahmedov. Sonymen qatar kásipqoı boksshy óziniń demalysyn qaıda ótkizetini týraly da aıtyp berdi. «Jekpe-jek ótkizer kezde jáne oǵan daıyndyq barysynda kóbinese shetelde bolamyn. Sondyqtan elge jetkenshe asyǵamyn, ıaǵnı óz elimde demalǵandy jón sanaımyn. Jýyrda ǵana dostarymmen Býrabaıda demalyp qaıttym», dedi ol.
Eske sala keteıik, buǵan deıin tanymal qazaqstandyq ánshi Dımash Qudaıbergen alǵashqy bolyp týrızm elshisi atanǵan edi. Osyǵan oraı byltyr Qytaı, Ońtústik-Shyǵys Azııa jáne keıbir Eýropa elderindegi jankúıerler men mýzyka súıer qaýym arasynda onyń erekshe tanymaldyǵyn eskere otyryp, jankúıerler qozǵalysynyń 10 elden kelgen jetekshileriniń qatysýymen «Dımash Otany» atty alǵashqy promo-týr uıymdastyryldy. Bul týrdyń baǵdaryna úsh qala: Astana – Almaty – Aqtóbe kirgen bolatyn.
«Kazakh Tourism» ulttyq kompanııasynyń týrızm elshileri qatarynda Sadrıddın Ahmedov pen Dımash Qudaıbergennen bólek, tanymal ushqyshtar Talǵat Musabaev, Iýrıı Batýrın jáne taǵy basqa birneshe elshi bar.
Ulttyq kompanııa basshysynyń aıtýynsha, bıyl týrızm elshileri ınstıtýty belsendi túrde keńeıtiledi dep josparlanýda. Sonymen qatar elshilerdiń qatysýymen Qazaqstan týrızmin el ishinde jáne shetelde nasıhattaý boıynsha birqatar jobany iske asyrý josparda bar.
Álı BITО́RE,
«Egemen Qazaqstan»
