Búgingi tańda Saıram aýdanynda 8 týrıstik nysan ornalasqan. Onyń 6-ýy qonaqúı, «Mankent» shıpajaıy jáne jeke menshiktegi emdik-saýyqtyrý ortalyǵy. Sonymen qatar aýdanda «Sıqym baba» kesenesi men «Janys baba» mavzoleıi bar.
Túrkistan oblysynyń jáne Shymkent qalasynyń jurtshylyǵy Saıram aýdanyndaǵy Aqsý ózeniniń boıynan oryn tepken jazǵy demalys oryndaryna jıi keledi. Qazirgi tańda ondaı oryndardyń 14-i maýsymdyq úlgide jumys isteıdi.
Aýdanda týrıstik marshrýt daıyndalǵan. Atalǵan marshrýtqa «Mankent» shıpajaıy, «Sıqym baba» jáne «Janys baba» keseneleri engizilip otyr. Týrıstik marshrýttardyń boıynda ınfraqurylymdy jetildirý maqsatynda Saıram aýdany boıynsha «Batys Eýropa-Batys Qytaı» halyqaralyq kólik dálizi boıynda 11 qyzmet kórsetý nysany ornalasyp, qyzmet kórsetýde.
Aǵymdaǵy jyly týrızm salasyn eki baǵytta damytý josparlanyp otyr. Birinshisi − saýyqtyrý týrızmi. Aýdan Shymkent qalasyna jaqyn ornalasqandyqtan jáne «Batys Eýropa-Batys Qytaı» halyqaralyq kólik dálizi aýdan ortalyǵyna jaqyn bolýyna baılanysty, oıyn-saýyqtyrý jáne emdik-saýyqtyrý týrızmi jaqsy damyp otyr. Osy jyly Aqsý aýyldyq okrýgine qarasty «Aqsýkent 2» aýylynda 3 qabatty ońaltý, saýyqtyrý ortalyǵyn iske qosý josparlanǵan. Jobanyń quny 500,0 mln teńgeni quraıdy.
Ekinshisi − tarıhı-mádenı eskertkishter. «Saıramda bar sansyz bab, Otyrarda otyz bab, Túrkistanda túmen bab, baptardyń baby Arystan bab, eń úlkeni Halen bab» ekeni barshamyzǵa málim. Osy tusta tilge tıek etken jón, 2017 jyly týrıstik marshrýt daıyndalyp, oǵan joǵaryda atalǵan úsh nysan engizilgen. Osy baǵytqa Qaramurt aýyldyq okrýginde ornalasqan, Qytaı tarıhnamasynda «sadaǵy men semseri» qolynan túspegen qaharman qolbasshy bolǵan Halen bab jáne Kólkent aýylynda ornalasqan Qazaq hany Abylaı hannyń bekinisi bolǵan «Hanqorǵan tóbesin» týrıstik marshrýt tizimine engizip, olardy jan-jaqty nasıhattaý, jarnamalaý jumystary júrgizilip jatyr.
Dáýren DÚISEBAEV
Túrkistan oblysy, Saıram aýdany
