Búgin zaýyt «Qazaqstan temir joly» UK» AQ-ǵa jáne basqa da kásiporyndarǵa temir jol dóńgelekterin jasaıdy. Jalpy, Ekibastuzda temir jolǵa qajetti qural-jabdyqtardyń bári jasalady. Júk vagondaryn da jasaıtyn kásiporyn bar. Deni 2010 jyly ashylǵan kompanııalar sodan beri biraz qıyndyqtan ótip keledi.
Endi mine, «Prommashkomplekt» JShS-na ınnovasııalyq ózgeris engizildi. Metaldy balqytyp, odan dóńgelekter quıyp shyǵarý isi birneshe satydan turady. Jumysy avtomattandyrylǵan robottardy operatorlar kompıýter arqyly basqarady.
Seriktestiktiń basshysy Dáýlet Syzdyqov málim etkenindeı, bul jobanyń jalpy quny 54 mlrd teńgeni quraıdy. Onyń 36 mlrd teńgesi Qazaqstannyń damý banki arqyly qarjylandyrylǵan.
«Qazaqstannyń damý banki» AQ el ekonomıkasynyń shıkizattyq emes jáne ınfraqurylymdyq sektorlaryn jańǵyrtý jáne damytý jónindegi ulttyq damý ınstıtýty sanalady. Iаǵnı, óndiristik ınfraqurylymdy jáne óńdeý ónerkásibin damytýǵa, syrtqy jáne ishki ınvestısııalar tartýǵa yqpal etedi. Ol ındýstrııalyq-ınnovasııalyq damý memlekettik baǵdarlamalarynyń asa iri ınvestısııalyq operatory sanalady.
Atalǵan banktiń basqarýshy dırektory Ádil Ismaǵambetovtiń aıtýynsha, jobanyń júzege asyrylýy elimizdiń shıkizattyq emes sektoryn damytý úshin óte mańyzdy. Importty almastyrý, eksporttyq áleýet jáne EAEO elderindegi uqsas óndiristermen salystyrǵanda joǵary ónimdilik sııaqty úsh quramdasy bar. Temir jol jelisi damyǵan elderdiń Qazaqstanǵa geografııalyq jaǵynan jaqyn ornalasqany da nazarǵa alynǵan. Bul da temir jol dóńgelekteriniń suranysyn arttyrady. Bolashaqta ónimdi sheteldik naryqqa shyǵarý da josparlanýda.
Negizi kásiporynnan jylyna 200 myń dóńgelek shyǵarý josparlanyp otyr.
– Mundaı óndiris orny buryn Qazaqstanda bolmaǵan. Buǵan deıin temir jolǵa qajetti dóńgelekterdi ımporttap kelgen edik. Osy tektes óndiristerdiń iske qosylýyn kóp kúttik. Bul – elimizdegi ındýstrııalandyrý baǵytyndaǵy mańyzdy qadam, – degen bolatyn Elbasy telekópir barysynda.
Birer jyl buryn Ekibastuzdaǵy temir jol klasterin jolǵa qoıý úshin kólemdi elektr energııasy qajet boldy. Energııa beretin stansa jobasyn «Siemens» kompanııasy jasap shyqty. Memlekettik-jekeshelik áriptestik aıasynda byltyr jazda jańa elektr stansasy iske qosyldy.
Sol stansa qazir «Prommashkomplekt» JShS-dan bastap, temir jolǵa qajetti zattar jasap shyǵaratyn «R.W.S. Wheelset», «R.W.S. Concrete», «R.W.S. BINDING» sııaqty kásiporyndardy da elektr energııasymen qamtamasyz etedi.
Farıda BYQAI,
«Egemen Qazaqstan»
EKIBASTUZ
