Oblystyq palataǵa jaqynda osydan eki jyl buryn sulýlyq salonyn ashqan Aızada Asqarbek esimdi kásipker keldi. Mamandyǵy – qurylysshy. Gaz salasynda jumys istegen Aızada qaryndasymyz quı senińiz, quı senbeńiz búginde qaladaǵy tańdaýly sulýlyq salonyna aınalǵan kásip kózin ashqanda qaltasynda 100 myń teńge ǵana bolǵan eken. Ápkesi – shashtaraz. Eldiń ishinde kásipkerler kóbeıip kele jatqan shaq. Bir kúni ápkesi «Aızada, sen sýretti jaqsy salasyń ǵoı. Sýretshiden jaqsy bet árleýshi shyǵady. Nege ekeýmiz birigip sulýlyq salonyn ashpaımyz» dep oı salady. «Táýekel túbi − jelqaıyq, ótesiń de ketesiń» degen qanatty sóz bar. Boıyn jańa iske degen qushtarlyq kernegen Aızada Almatyǵa baryp, Sandı Beksyrǵanyń sheberlik mektebinde sabaq alady. Talaptanǵan adamnyń órisi keń. Sóıtip óz kúshine sengen ekeýi eki oryndyq, eki aınamen jumys bastap ketedi. Árıne bári oıdaǵydaı bolmaǵan. Eki qoldy bir siltep, salondy endi qaıtip kórmespiz degen oı da ıektegen. Sonda da shydamdylyq tanytty. Endi beınettiń tátti jemisin jep otyr. Salon keńeıgen soń jumys ta kóbeıip, segiz adamǵa jumys taýyp berdi.
Aızadany Kásipkerler palatasyna jetelep kelgen kúsh − kásibiniń keregesin keńeıtý.
– Jaqynda tanystarymnan Kásipkerler palatasynyń «Atameken Services» portalynyń múmkindikteri týraly estidim. Maǵan erekshe unaǵany – «Nesıe agregatory» bólimi. Salondy keńeıtý úshin memleketten jeńildetilgen nesıe alyp, ǵımarat alǵym keldi. Biraq bankterdiń talaby, artyqshylyǵy, jeńildikteri týraly qolymda aqparat bolǵan joq. Tipti bank jaǵalaıtyn ýaqytym da joq. Birneshe kún buryn «Atameken Services» portaly arqyly ótinim berdim. О́tinishimdi birneshe bank qatar qaraıdy eken jáne qaraý merzimi de uzaq emes. Jaqyn kúnderi oń qorytyndy alyp, kózdegen maqsatyma jetemin degen úmittemin. Bank aralap sharshamaı, topyrlaǵan qaǵazdardy alyp júrmeı, máselemniń osylaısha ońaı sheshilip jatqany qýantady, – deıdi Aızada Asqarbek.
Aıta ketý kerek, «Atameken Services» − bul bızneske arnalǵan paıdaly ári tegin qyzmetter usynatyn platforma. «Nesıe agregatory» – keńseden shyqpaı-aq onlaın túrinde jeńildikpen nesıe alýǵa ótinim toltyryp, elimizdiń barlyq qarjy ınstıtýttary men bankterine tapsyrys bere alatyn úlken múmkindik.
Jas kásipker osy múmkindikti paıdalanyp otyr.
Baqtııar TAIJAN,
«Egemen Qazaqstan»
Qyzylorda oblysy
