A.Mamın máslıhat depýtattaryna Memleket basshysynyń O.Orazalınniń kandıdatýrasyn Aqtóbe oblysynyń ákimi laýazymyna usyný týraly hatyn oqyp berdi. Depýtattar el Prezıdenti usynǵan kandıdatýrany biraýyzdan qoldady.
Ońdasyn Seıiluly Orazalın 1963 jyly dúnıege kelgen. Aqtóbe pedagogıkalyq ınstıtýtyn, S. M. Kırov atyndaǵy Qazaq memlekettik ýnıversıtetin támamdaǵan. Memlekettik qyzmette ártúrli laýazymdardy atqarǵan, kommersııalyq sektorda jumys istegen. Atap aıtsaq, Aqtóbe oblysynyń Muǵaljar aýdanynyń ákimi, Aqtóbe oblysy ákiminiń orynbasary. 2017 jylǵy naýryzdan bastap Prezıdent Ákimshiligi Basshysynyń orynbasary bolyp eńbek etken.
A. Mamın kezekten tys sessııa qorytyndysy boıynsha Aqtóbe oblysynyń aktıvimen kezdesý ótkizdi. Premer-Mınıstr B.Saparbaevqa óńirdiń damýyna qosqan úlesi úshin alǵys bildirdi. Jumystyń 4 jylynda oblystyń áleýmettik-ekonomıkalyq damýynda eleýli nátıjelerge qol jetkizildi, jańa ındýstrııalyq jobalar iske asyryldy, áleýmettik salaǵa úlken serpin berildi. A.Mamın B.Saparbaevqa jańa qyzmetinde tabys tilep, Elbasynyń kórsetken joǵary senimin abyroımen aqtaıtynyna senim bildirdi. Eske sala keteıik, Prezıdent N.Nazarbaevtyń Jarlyǵymen B.Saparbaev Aqtóbe oblysynyń ákimi qyzmetinen bosatylyp, Eńbek jáne halyqty áleýmettik qorǵaý mınıstri bolyp taǵaıyndaldy.
Premer-Mınıstr jańa ákimdi tanystyrý barysynda O.Orazalınniń túrli jaýapty basshylyq laýazymdarda, sonyń ishinde Aqtóbe oblysy ákiminiń orynbasary qyzmetinde úlken jumys tájirıbesi bar ekenin atap ótti. Sońǵy jyldary Prezıdent Ákimshiligi Basshysynyń orynbasary bolyp qyzmet etken. Ol óńirlik jumystyń, sondaı-aq áleýmettik jańǵyrý salasynyń qyr-syryn meńgergen. A.Mamın jańa ákimge sáttilik tilep, oblys aktıvimen birlesip, Elbasy alǵa qoıǵan mindetterdiń sapaly oryndalýyn qamtamasyz etetinine senim bildirdi.
Sondaı-aq Prezıdent tapsyrmasymen Premer-Mınıstr A.Mamın Túrkistan oblysyna baryp, oblystyq máslıhattyń kezekten tys sessııasyna qatysty.
A.Mamın sessııa barysynda máslıhat depýtattaryna Memleket basshysynyń О́.Shókeevti Túrkistan oblysynyń ákimi laýazymyna taǵaıyndaý usynysy týraly hatyn oqyp berdi. Daýys berý qorytyndysy boıynsha depýtattar Prezıdent usynǵan kandıdatýrany biraýyzdan qoldady.
О́mirzaq Estaıuly Shókeev 1964 jyly Túrkistanda dúnıege kelgen. Máskeý ekonomıkalyq-statıstıkalyq ınstıtýtyn támamdaǵan. Joǵary jaýapty laýazymdarda jumys istegen. Atap aıtsaq, Ońtústik Qazaqstan jáne Qostanaı oblystarynyń ákimi, Ekonomıka jáne saýda mınıstri, Prezıdent Ákimshiligi Basshysynyń orynbasary, Astana qalasynyń ákimi, Premer-Mınıstrdiń birinshi orynbasary, «Samuryq-Qazyna» UÁQ» AQ basqarma tóraǵasy. 2017 jylǵy jeltoqsannan bastap Premer-Mınıstrdiń orynbasary – Aýyl sharýashylyǵy mınıstri qyzmetin atqarǵan.
Premer-Mınıstr Túrkistan oblysynyń aktıvimen ótken kezdesýde J.Túımebaevqa atqarǵan jumysy úshin alǵys bildirdi. Túrkistan qalasynyń alǵashqy ákimi retinde ol oblys ortalyǵyn Túrkistan qalasyna kóshirý, jańa oblystyń ákimshilik-aýmaqtyq qurylymyn uıymdastyrý, kóshi-qon máselelerin, jańa qalanyń aýqymdy qurylys jumystaryn uıymdastyrý boıynsha birqatar jumys atqardy.
A.Mamın oblystyń jańa ákimin tanystyra otyryp, О́.Shókeevtiń Qostanaı, Ońtústik Qazaqstan oblystarynyń jáne Astana qalasynyń ákimi retinde atalǵan óńirlerdiń áleýmettik-ekonomıkalyq damýyna úlken úles qosqanyn atap ótti. Budan ózge Premer-Mınıstrdiń orynbasary – Aýyl sharýashylyǵy mınıstri retinde ózin isker, tájirıbeli basshy jáne joǵary deńgeıdegi uıymdastyrýshy retinde kórsetti. Kásibı biliktiligi men jaýapkershiligi áleýmettik mańyzdy mindetterdi sapaly oryndap, Memleket basshysynyń senimin aqtaýǵa múmkindik beredi.
«Túrkistan oblysynyń damýy Elbasynyń erekshe nazarynda. Memleket basshysynyń bastamasymen qasıetti Túrkistan qalasynda jańa úlken qurylys bastaldy», degen A.Mamın, jergilikti atqarýshy organdar aldynda jańa qalanyń jańǵyrýyn ýaqtyly qamtamasyz etip, búkil túrki áleminiń mádenı-rýhanı astanasy retinde órkendetý jáne ony qarqyndy damytý, jańa jumys oryndaryn ashý, azamattardyń áleýmettik jaǵdaıyn jaqsartý boıynsha zor jaýapkershilikti júkteıtin mindetter qoıylǵanyn atap ótti.
Temir QUSAIYN,
Ǵalymjan ELShIBAI,
«Egemen Qazaqstan»
