Qar sýy men tasqyn sýlardy jınaý úshin sý qoımalaryn salý jáne rekonstrýksııalaý boıynsha 26 shaǵyn sý qoımasynyń qurylysyn júrgizý arqyly aýyl sharýashylyǵy aınalymyna jańa 25,5 myń gektar jer engizý kózdelip otyr. Onyń ishinde, Kentaý qalasyndaǵy Shoshqakól toǵanyn, Saryaǵash aýdanyndaǵy Darbazasaı sý qoımasyn salýǵa Aýyl sharýashylyǵy mınıstrligi Sý resýrstary komıtetine ınvestısııalyq usynys berilgen. Al Shoshqakól toǵany boıynsha Ulttyq ekonomıka mınıstrliginiń oń sheshimi alyndy. Sý qoımalaryna qatysty komıssııa otyrysynda oblys ákimi tıisti mekemelerge óńirdegi barlyq sý toǵandaryna baqylaýdy kúsheıtýdi tapsyrdy. «Sýarmaly jerlerdi qalpyna keltirý baǵytyndaǵy kanaldardyń respýblıkalyq menshikke ótkizilýi qajet. Oblystaǵy barlyq sý qoımalary men toǵandardyń jaǵdaıyna taldaý júrgizilsin. Qatań tekseriledi. Qar sýy men tasqyn sýlardy jınaý úshin josparlanǵan 26 shaǵyn sý qoımasynyń jobalyq-smetalyq qujattaryn merziminde ázirlep, qurylys jumystary bastalýy tıis», dedi oblys ákimi J.Túımebaev. Sondaı-aq eks-oblys ákimi jaz mezgilinde egin alqaptarynda sý tapshylyǵyn joıý maqsatynda arnaıy is-shara qabyldap, oblystyń sýarmaly egistik alqaptarynyń ulǵaıýyn qamtamasyz etýdi tapsyrdy.
Bul rette sý qoımalary oblystyq tótenshe jaǵdaılar departamenti tarapynan baqylaýǵa alynǵan. «О́ńirdegi eń úlken Shardara sý qoımasynyń tolý deńgeıi 85 paıyz bolsa, Kóksaraı sý rettegishinde – 50 paıyz. Barlyq sý qoımalary boıynsha kúndelikti aqparat alynyp, monıtorıng júrgizilýde. Iаǵnı sý qoımalarynda bos sý qory jetkilikti. О́zenderdegi sý deńgeıi de qalypty jaǵdaıda. Bıylǵy jaýyn-shashyn mólsheri normadan az. Jalpy sý tasqyny qaýpi joq. Degenmen, barlyq sý kózderi qatań baqylaýda», deıdi Túrkistan oblysy tótenshe jaǵdaılar departamenti tótenshe jaǵdaılardyń aldyn alý bóliminiń bas mamany Isa Eleýsizov.
Ǵalymjan ELShIBAI,
«Egemen Qazaqstan»
Túrkistan oblysy
