Ol negizin salǵan ánshilik mektep erekshe oryndaýshylyq sheberlikti qajet etedi. «Kókireginen ásem ánniń kók muhıtyn shaıqaǵan, eı, Ǵareke! Qasıetti qazyna jyr, baıtaq án», dep Tólegen Aıbergenov jyrǵa qosqan qazaq mýzyka mádenıetiniń qubylysy Ǵarıfolla Qurmanǵalıevtiń týǵanyna bıyl 110 jyl. Muhıt murasyn nasıhattaýshy, ǵajaıyp ánshi-kompozıtordyń qurmetine arnalyp Atyraýda respýblıkalyq baıqaý ótti.
«Aqjaıyqtan án ozdyrǵan» dep atalǵan ánshiler baıqaýyna elimizdiń túkpir-túkpirinen dástúrli ónerdi dáripteýshiler qatysty. Atyraý oblystyq ákimdiginiń qoldaýymen oblystyq mádenıet, arhıvter jáne qujattama basqarmasy, Dına Nurpeıisova atyndaǵy akademııalyq qazaq halyq aspaptar orkestri uıymdastyrǵan shara eki kúnge sozyldy.
– Elbasy «Uly dalanyń jeti qyry» atty maqalasynda «Uly dalanyń uly esimderi», «Dala folklory men mýzykasynyń myń jyly» jobalaryn aıryqsha atap ótti. «Bolashaqqa baǵdar: rýhanı jańǵyrý» baǵdarlamasy da ulttyq ónerdi ulyqtaý baǵytyndaǵy ıgi isterge arqaý bolyp otyr. Bul shara Memleket basshysynyń osy baǵdarlamalaryn júzege asyrýdy maqsat etedi, – dedi baıqaýdyń ashylý saltanatynda oblystyq mádenıet, arhıvter jáne qujattama basqarmasynyń basshysy Salamat Sabyr.
Qazaqstannyń eńbek sińirgen qaıratkeri, Batys Qazaqstan oblystyq Ǵ.Qurmanǵalıev atyndaǵy fılarmonııanyń ánshisi Qatımolla Berdiǵalıev bastaǵan qazylar alqasy dúbirli óner dodasyna qatysýshylarǵa baǵa berdi. Baıqaý nátıjesinde júldeli birinshi oryndy mańǵystaýlyq Nurym Asqarov pen batysqazaqstandyq Danııar Eleýsinov jeńip aldy.
Baqytgúl BABASh,
«Egemen Qazaqstan»
ATYRAÝ
