Atyraý oblystyq polısııa departamenti baspasóz qyzmetiniń málimetinshe, jol-kólik oqıǵasy Inder-Atyraý tas jolynda ornalasqan Kóktoǵaı aýyly mańynda bolǵan. Apat saldarynan úsh adam qaza tapty. Avtobýsta bolǵan 43 adamnyń 15-i balalar. Balalardyń arasynda qaza tapqandar joq.
Atyraý oblystyq densaýlyq saqtaý basqarmasynyń baspasóz qyzmeti xabarlaǵandaı, apatqa ushyraǵan 15 adam Atyraý oblysynyń medısınalyq mekemelerine ákelindi. Dárigerlerdiń aıtýynsha, 5adam Atyraý oblystyq aýrýxanasyna jetkizildi. Osynsha adam Mahambet aýdanynyń ortalyq aýdandyq aýrýhanasyna jáne 4 adam Inder aýdanynyń ortalyq aýdandyq aýrýhanasyna emdeýge tirkeldi.
Qazirgi ýaqytta barlyq medısınalyq qyzmetter zardap shekkenderdi qabyldaýǵa daıyn. Oqıǵa ornynda 10 jedel járdem brıgadasy jumys istedi. Mobıldi dárigerlik ambýlatorııa ornalastyrylǵan.
Aýdan ákimdigi tótenshe jaǵdaı bolǵan avtobýs jolaýshylaryna ystyq tamaq uıymdastyrdy, úılerine jetkizý úshin kólik daıyndady. Psıholog zardap shekkendermen jumys isteıdi. Oblystyq densaýlyq saqtaý basqarmasynda atap ótkendeı, olardyń densaýlyǵyna qaýip joq.
Jolaýshylar men olardyń jaı-kúıi týraly qajet aqparatty alý úshin 98 02 92, 8778 0072021 telefondary táýlik boıy baılanysta. Apattyń sebepterin tergeý júrgizetin organdar anyqtaýda. Aldyn-ala tergeý Qazaqstan Respýblıkasy Qylmystyq kodeksiniń 345-babynyń 4-tarmaǵy - «Kólik quraldaryn basqaratyn tulǵalardyń jol qozǵalysy erejelerin buzý nemese kólik quraldarynyń jumysyn buzý» boıynsha júrgiziledi.
Baqytgúl BABASh,
«Egemen Qazaqstan».
Atyraý
