Jyl saıyn aqpan aıynyń sońǵy kúninde sırek kezdesetin nemese orfandyq aýrýlar problemasyna álem nazary aýdarylyp, qursaqtaǵy sharananyń damý barysynda genetıkalyq aýytqýǵa ushyraýdan paıda bolǵan dertke qatysty máseleler kóteriledi. Bul jolǵy konferensııa taqyryby–Goshe aýrýyna arnaldy.
Ulttyq Ana men bala ortalyǵy departamentiniń basshysy Ernas Tóleýtaev: «Qazaqstanda sırek kezdesetin aýrýlardyń qarmaǵyna ilikken pasıentterdiń jalpy sany 1000 adamǵa jýyq. Mundaı pasıentterdiń ferment tolyqtyrýshy terapııany alýy asa mańyzdy, sebebi, dıagnoz ýaqytynda qoıylyp, durys em taǵaıyndalatyn bolsa, pasıentter uzaq ári tolyqqandy ómir súre alady» degen. Al «Goshe aýrýyna shaldyqqan múgedek balalar» QB dırektory Irına Sım: «Búgingi tańda Qazaqstanda Goshe aýrýyna shaldyqqan 23 pasıent bolsa, olardyń kóbi balalar. Ýaqytyly dıagnozy qoıylyp, tıisti fermenttik terapııany alǵanda olar balabaqshalarǵa barady, mektepterde, kolledjder men ınstıtýttarda oqıdy, jumys isteıdi, otbasyn qurady. Alaıda aýrýdyń sırek kezdesetinine baılanysty bul dert jaıynda qoǵam túgil dárigerlerdiń de biligi azdaý. Osy rette sırek kezdesetin aýrýlardy dıagnostıkalaýdyń jáne emdeýdiń jańa standarttaryn engizý boıynsha jańa jol kartasynyń júzege asýyna úlken úmit artamyz. Memleket bizdiń basymyzdaǵy aýyrmalyqty birge kóterisip, álemdik terapııada tıimdi qoldanylatyn zamanaýı preparattarmen ınnovasııalyq emdi tegin alýǵa múmkindik jasady», deıdi.
Aıta ketý kerek, mundaı sırek keseldi emdeý qomaqty somany qajet etedi, sondyqtan orfandyq aýrýlardy qajetti terapııamen qamtamasyz etýdegi shyǵyndardy memleket tegin medısınalyq kómektiń kepildik berilgen kólem aıasynda tolyq ózine alǵan. Bir balanyń jyldyq emdelýine respýblıkalyq bıýdjetten 40 mln bastap 80 mln teńgege deıin bólinedi, sebebi bir ampýlanyń baǵasy 300 myńnan bastap, 600 myń teńge mólsherinde.
Anar Tóleýhanqyzy,
«Egemen Qazaqstan»
