AQSh prezıdenti Donald Tramp pen KHDR tóraǵasy Kım Chen Ynnyń Hanoıda ótken kezdesýi «jaqsy ári konstrýktıvti» bolǵan. Bul týraly eki eldiń basshysy málimdedi. «Qazir eki jaq kelisimge kelgen joq, biraq olardyń komandalary muny asyǵa kútip otyr», delingen Aq úıdiń habarlamasynda.
Kezdesý nátıjesine súıensek, eki jaqty deklarasııaǵa qol qoıylmaýy múmkin. Al sammıt baǵdarlamasy belgilengen ýaqyttan erterek aıaqtalady dep boljam jasalyp otyr.
Soltústik Koreıanyń denýklearızasııalanýy múmkin be?
Buǵan deıin Kım Chen Yn AQSh prezıdenti Donald Tramppen ekinshi kúni kezdesýde ıadrolyq qarýdan bas tartýǵa daıyn ekenin málimdegen bolatyn. Qos basshy da dóńgelek ústelde pikir almasyp, denýklearızasııaǵa qatysty ortaq sheshimge kelýge tyrysty.
«Iаdrolyq qarýdan bas tartýǵa daıynsyz ba?» degen jýrnalısterdiń suraǵyna Kım Chen Yn: «Eger men daıyn bolmasam, munda kelmes edim», dep jaýap bergen. Alaıda, Soltústik Koreıa basshysy denýklearızasııany qalaı júzege asyratynyn jáne qandaı sharalar qoldanatynyn ashyp aıtpady.
AQSh óz tarapynan KHDR-diń ıadrolyq qarýdan tolyǵymen bas tartqanyn, al KHDR búginde AQSh-tyń azııalyq odaqtastaryn – Ońtústik Koreıa men Japonııany – qorǵap turǵan ıadrolyq qalqanynan bas tartqanyn qalaıdy.
Tramptyń sózine súıensek, Soltústik Koreıanyń denýklearızasııasyna asyǵýdyń qajeti joq. «Áýel bastan men ýaqytty tezdetýdiń mańyzdy emes ekenin aıtqan bolatynmyn. Iаdrolyq raketalardy synaqtan ótkizý doǵarylǵanyn óte joǵary baǵalaımyn. Kım myrza ekeýmiz durys kelisim jasaǵymyz keledi», dedi ol.
Kım Chen Ynnyń Tramppen kelisim-shartqa qol qoıý máselesi jumbaq kúıde qaldy. «Áli bir nárse deýge erte. Biraq, men pessımıst emespin. Bizde jaqsy nátıje bolady dep oılaımyn», dedi Kım Chen Yn.
Jýrnalısterdiń Kım Chen Ynǵa qarata qoıylǵan «Adam quqyqtary týraly másele talqylandy ma?» degen suraǵyna Tramp: «Bárin talqyladyq», dep jaýap berdi.
«Bizde prodýktıvti pikirtalas boldy. Qarym-qatynasymyz ádettegideı, múmkin odan áldeqaıda jaqsy», dedi Donald Tramp.
Saltanat ShYNÁDIL
