UEM derekteri boıynsha, ózge salalar jumyskerleri men tehnıkalyq personaldyń jalaqysy 30%-ǵa artady. 643 407 jumysker qamtylady. Bul — áleýmettik jumyskerler, kitaphanashylar, ormanshylar, veterınar dárigerler, is júrgizýshiler, aýla sypyrýshylar, tehnıkalyq personal jáne t.b.
«Eger ortasha jalaqy 69 myń teńgeni qurasa, endi 90 myń teńgeni quraıdy. Qosymsha qajettilik 459,5 mlrd teńgeni quraıdy, onyń ishinde 2019 jyly – 90,7 mlrd teńge», — dedi Ulttyq ekonomıka mınıstri.
Bul 78 myń ákimshilik memlekettik qyzmetshiniń jalaqylaryna qatysty bolady. Olar jergilikti deńgeıdegi jumyskerler: sarapshylar, jetekshi mamandar, bas mamandar. Olar oblystarda, aýdandarda, aýyldarda jumys isteıtin adamdar. Ortasha ósim 25% quraıdy.
«Bas mamannyń ortasha jalaqysy 84 myń teńgeni qurasa, endi 100 myń teńge bolady. Qosymsha qajettilik 76,5 mlrd teńgeni quraıdy, onyń ishinde 2019 jyly – 15,3 mlrd teńge», — dep naqtylady R. Dálenov.
Budan ózge, Ulttyq ekonomıka mınıstriniń aıtýynsha, mono jáne shaǵyn qalalardy damytýǵa jylyna 10 mlrd teńge bólinedi. Bul mono jáne shaǵyn qalalardaǵy ınjenerlik-kommýnıkasııalyq ınfraqurylymnyń 100 jobasyn salýdy nemese rekonstrýksııalaýdy qamtamasyz etedi.
«Perspektıvalyq aýyldardy damytý úshin "Aýyl – el besigi" arnaıy jobasy qarjylandyrylady. Buǵan 3 jylda 90 mlrd teńge bólinedi. 1,5 myńǵa jýyq perspektıvalyq aýyl qamtylady. Perspektıvalyq sanyna, ornalasqan ornyna, damý áleýetine jáne t.b. baılanysty anyqtalady», — dedi R. Dálenov.
