Osy jyldar ishinde qazaq tilin meńgerý deńgeıi de birshama jetilgen. Búginde qazaq tilinde óz oıyn erkin jetkizýge tyrysyp júrgen Kams Abaı aqynnyń shyǵarmalaryna qushtar.
Abaı men onyń ana tilin ardaqtap, ony meńgerýge talaptanǵan Kams Kamýabonyń Aqtaý qalasynda halyqaralyq Ana tili kúnine oraı uıymdastyrylǵan «Til – tuǵyrymyz, soǵyp turǵan júregimiz» atty tilder saıysynda baǵy jandy.
Qazaqstan halqy Assambleıasy Mańǵystaý oblystyq fılıalynyń uıymdastyrýymen 15-25 jáne 25-40 jastaǵy shet tildi azamattar arasynda alǵash ret ótti. Ulttar dostastyǵyn arttyryp, qazaq tilin úırenýge yntalandyrý maqsatyndaǵy saıys eki kezeńnen turdy. Birinshi kezeńde qatysýshylar óz ana tilinde belgili qalamgerlerdiń týyndylaryn jatqa aıtsa, ekinshi kezeńde shyǵarmany qazaq tilinde jatqa aıtýy kerek edi.
Kams Kamýabo kórermenderdi Abaı Qunanbaevtyń «Jelsiz túnde jaryq-aı» ánin qazaq tilinde naqyshyna kelip oryndaýymen qýantty jáne saıys qorytyndysynda bas júldege ıe boldy.
– Men til baıqaýyna alǵash ret qatysqandyqtan qobaljydym. Biraq kórermenderdiń demeýi maǵan týyndylardy kóńilden shyǵatyndaı etip oryndaýǵa múmkindik berdi. Men Abaı Qunanbaevtyń shyǵarmalaryn jaqsy kóremin. Aqynnyń «Jelsiz túnde jaryq aı» ánimen birge, «Kózimniń qarasy» áni de maǵan qatty unaıdy, – deıdi ol.
Jeńimpazdyń oıynsha baıqaý barysynda shyǵarmanyń mazmunyn túsinip oryndaý mańyzdy. Abaıdyń tereń oılaryn aǵylshyn tilinde aıtyp bergen ol uly oıshyldyń eńbekterin únemi oqýǵa tyrysatyn kórinedi.
– Qazaq tili – erekshe til. Sondyqtan úırenýdi áli jalǵastyramyn. Bizdiń mektebimizde shetel ustazdaryna qazaq tilin úırený sabaǵy bar. Sol sabaqqa turaqty túrde qatysyp qana qoımaı, «Qazaq» radıosyn, telearnalardaǵy qazaq tildi shoýlardy kórgendi jaqsy kóremin, – dep sózin sabaqtady Kams.
Saıysta qazaq tilin meńgerý sheberligimen tánti etken zııatkerlik mekteptiń hımııa páni muǵalimi Venera Sýrovseva ekinshi orynǵa laıyq dep tanyldy.
Sheteldik ustazdardyń qazaq tilin bilýge qyzyǵýshylyǵy jáne qazaq tilin óte baı til dep joǵary baǵalaýy kóńil ósirdi. Keıbir baýyrlarymyz qadirin bilmeı júrgen qazynamyzdy jatjurttyqtar zor tutyp jatsa, árıne zor qýanysh.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
