- Reseıdegi Gran-prı týrnırinde biz alǵash ret úzdik bes komanda qataryna endik. Búginge deıin bizdiń aldymyzdy orap kelgen Túrkııa men Ázirbaıjan qyzdarynan osy joly ozdyq. Bul basymdyqty ári qaraı arttyra túskimiz keledi. Máskeýdegi báseke jyldyń eń alǵashqy resmı dodasy bolǵandyqtan, komandalar men jekeleı syn qatysýshylary kóptegen qatelikter jiberdi. О́ıtkeni, maýsym basynda barlyǵy da jańa baǵdarlama daıyndaıdy. Al ony aına-qatesiz oryndap, «pisirý» úshin áli ýaqyt kerek. Gımnastar shamamen kóktemniń aıaǵy men jaz bastalǵanda naǵyz babynda bolady, - deıdi bapker.
Toptyq jattyǵýdan Qazaqstan komandasynda alty sportshy óner kórsetedi.
Olar: Djessıka Býdnık, Daıana Jakýpova, Regına Sultanova, Janerke Dáýletqulova, Saǵına Muratqyzy jáne Darııa Sharafıdenova.
- Gımnastardyń barlyǵy derlik meniń kóz aldymda ósti. Olardy alty jasynan bastap tárbıeledim. Búginde olar sulý ári symbatty qyzdarǵa aınaldy. Olar buryn Astana qalasynyń komandasy retinde baq synaǵan, endi mine, ulttyq quramanyń negizin qalap otyr. Tek eki sportshyny basqa qaladan tapqanymyzdy aıtqym keledi. Janerke Dáýletqulova Taraz, Saǵına Muratqyzy Shymkent qalasyndaǵy kórkem gımnastıka mektebiniń túlegi. Ekeýin ázirge bir baǵdarlamaǵa qosyp júrmin, bolashaqta shyńdala túseri sózsiz. Qyzdardyń bári talantty, bári sulý, - deıdi Oksana Nechıtaılo.
Bapkerdiń aıtýynsha, Gran-prı kezeńderin baǵalaıtyn tóreshiler qataryna qazaqstandyqtar enbegen. Buǵan bizdegi tóreshiler kishi sanatta bolýy áser etip otyr.
- Toptyq jattyǵýǵa baǵa beretin qazylar qatarynda bizdiń ókilimiz joq. Gımnastar ónerin baǵalaýdy joǵary sanatty tóreshilerge tapsyrady. О́kinishke qaraı, santy tómen bolǵandyqtan, qazaqstandyq mamandar qazylar quramyna enbegen. Negizi, ózimizden bir tóreshiniń tórde otyrǵany artyq bolmaıdy. Kelesi maýsymda osy másele oń sheshimin tapsa degen tilegim bar. Al jalpy daıyndyqqa keler bolsaq, aıtarlyqtaı qıyndyq joq. Astanadaǵy federasııanyń arnaıy zalynda daıyndalamyz. Ulttyq Olımpıadalyq komıteti bar shyǵynymyzdy kóterip, jaǵdaıymyzdy jasaýda, - deıdi bapker.
Kórkem gımnastıkadan Qazaqstan komandasy naýryz aıynda Ýkraına astanasy Kıevte ótetin Gran-prı kezeńine daıyndalýda. Qurama aldynda Azııa jáne álem chempıonattarynda sátti óner kórsetý mindeti tur.
- Bizdiń komandamyz áli jas. Máskeýdegi týrnırden soń kóptegen sheteldik mamandardyń kóńilinen shyqqan jaıymyz bar. Aıtarlyqtaı qatelik jibermedik. Maýsym basy bolǵandyqtan, eń myqty degen Reseı quramasynyń ózi bilgeninen jańyldy. Degenmen, gımnastardy bul úshin kinálaýǵa bolmaıdy. Eń mańyzdy jarystyń bári alda. Jazda Taılandta ótetin Azııa chempıonaty men qyrkúıek aıynda Bakýde ótetin álem chempıonatyna qatysý jospary tur. Sol syndarda aıanyp qalmaýǵa tyrysamyz. Árıne, Olımpıada joldamasy da oıymyzda. Biraq lısenzııa jeńip alý ońaıǵa soqpaıdy, - dedi komanda bapkeri.
