Keshe saǵat keshki 22:18-de «101» О́rt sóndirý baılanysynyń ortalyq pýltine Buhar jyraý kóshesinde ornalasqan turǵyn úıde elektroqalqannyń janýy týraly habar tústi. Oqıǵa ornyna tez arada mamandandyrylǵan órt sóndirý bóliminiń kezekshi qaraýyly jóneltildi. Shaqyrý ornyna jetken kezde qutqarýshylar 8 qabatty «Kamal-4» turǵyn úı keshenindegi páterdiń balkony men jatyn bólmesinde jıhaz, orgtehnıka, kıim-keshek sııaqty zattardyń janyp jatqanyn anyqtaǵan bolatyn. О́rt 15 sharshy metrdi sharpyǵan.
«Tútin kireberistiń barlyq qabattaryna taralyp, turǵyndardyń syrtqa shyǵý joldaryna kedergi keltirip, adamdardyń ómirine qaýip tóndirgen. О́rt ornyna kelgen órt sóndirý bólimsheleri órt sóndirý kezekshi qyzmetiniń jalpy basshylyǵymen adamdardy qutqarýǵa kiristi. Qutqarý jumystaryna avtosatylar jáne Gaz-tútinen qorǵaý qyzmetiniń býyndary jumyldyryldy», – delingen Astana qalasy TJD baspasóz qyzmeti taratqan habarlamada.
Jeke quram joǵarǵy qabattardaǵy páterlerdiń terezelerinen baspaldaqtyń kómegimen 25 adamdy qutqaryp aldy. Qutqarylǵandardyń 10-y – balalar. Jalyn saǵat 22:46-ta aýyzdyqtalyp, 22:58-de tolyqtaı óshirildi. Aldyn ala boljamdarǵa sáıkes órt elektr symdarynyń qysqa tuıyqtalýynyń saldarynan shyqqan. О́rt saldarynan eki er adam, bir áıel jáne eki bala ıisti gazdan ortasha deńgeıde ýlanyp, aýrýhanaǵa jetkizildi. О́rtti sóndirýge Astana qalasy TJD 5 órt sóndirý tehnıkasy men jeke quramnyń 23 adamy jumyldyryldy.
