Oblys ákimi Ońdasyn Orazalın qatysqan basty resmı saltanatty shara Aqtóbedegi «Qazaq halqyna myń alǵys» eskertkishiniń aldyndaǵy alańda ótti. Munda ulttyq taǵamdardyń jármeńke-kórmesi men azyq-túlik jármeńkesi uıymdastyrylyp, oǵan oblystyń barlyq aýdandary qatysty.
Saltanatty sharany «Qazaq eline myń alǵys» teatrlandyrylǵan kórmesi ashty. Oblystaǵy barlyq 18 etnomádenı birlestiktiń ókilderi bı jáne mýzykalyq nómirlerimen sahnaǵa shyqty. Olardyń árqaısysy alǵystaryn aıtyp, ár túrli tilde óz Otany – Qazaqstandy madaqtady.
«Alǵys aıtý kúni – bul barlyq ulys ókilderiniń bir-birin jáne barlyǵy birigip qazaq halqyna tolyqqandy memlekette, halyqaralyq kelisim men beıbitshilik ornaǵan elde ómir súrip jatqandary úshin alǵystaryn bildiretin kún. Bul rızashylyq bizdiń árdaıym júregimizde, biraq biz búgin ony jumyla, ásirese Qazaqstanǵa qonys aýdarǵan halyqtardyń ókilderi bolyp bildire alamyz»,- dedi Qazaqstan káristeri qaýymdastyǵynyń Aqtóbe fılıaly tóraǵasy Konstantın Shaı.
«Táýelsizdik jyldary, tarıhı Otanǵa oralý múmkindigi týǵan kezde aqtóbelik bolgarlardyń eshqaısysy ketpedi, óıtkeni osy kúnge deıin alǵashqy qonys aýdarýshylardyń urpaqtary turyp jatqan kishkene aýyldary – Bolgarkany ózderiniń kishi Otandary dep sanaıdy. Osy bir mereke kúni halqymnyń atynan bizge Otan bolǵan Uly dalaǵa úlken alǵysymdy bildiremin»,- dedi oblystyq «Vıara» bolgar etnomádenı birlestiginiń basshysy Anastasııa Podolıanova.
Aqtóbelikterdi quttyqtaǵan óńir basshysy Alǵys aıtý kúni bizdiń ortaq tarıhymyzǵa degen qurmet, búkil qazaqstandyqtyń bir-birine degen meıirimdiligi, dostyǵy pen mahabbaty merekesi ekenin atap ótti.
«Otandastarymyzdyń yqylasynyń arqasynda osy bir mereke kúnderi muqtaj otbasylarǵa qaıyrymdylyq kómek kórsetýde úlken jumystar júrgizilýde. Bizdiń barlyq qaltaly azamattarymyzǵa, kásiporyn basshylary men jalpy jurshylyqqa ıgi isterdi júzege asyrýǵa belsendi túrde qatysqandary úshin alǵys bildirgim keledi. Bizder osyndaı jobalardy birlese júzege asyra otyra ózimizdiń aýyzbirshiligi men taǵdyryna beı-jaı qaramaıtynymyzdy kórsetemiz»,- dedi O.Orazalın.
Ol óz sózinde áleýmettik baǵdarlanǵan memleket pen qoǵamnyń damýy – Elbasynyń basty basymdyqtarynyń biri ekenin eske saldy.
««Nur Otan» partııasynyń jýyrdaǵy sezinde el Prezıdenti qazaqstandyqtardyń turmys sapasyn jaqsartýǵa qatysty birqatar tapsyrmalar berdi. Prezıdenttiń barlyq bastamalary men tapsyrmalary árbir qazaqstandyqtyń kútkeni men úmitine jaýap beredi, aldymyzdan elimizdiń ári qaraı damýynyń jańa perspektıvalaryn, árbir azamattyń bolashaǵyn ashady. Sondyqtan, bizder, aqtóbelikter, Prezıdent qoıǵan tapsyrmalar keshenin oryndaý úshin barlyq sheberligimiz ben kúshimizdi salýymyz kerek. Eldegi beıbitshilik, qoǵamdyq kelisim men ult birligin nyǵaıtý kóbine bizdiń jumysymyzdyń sapasyna baılanysty»,- dep atap ótti oblys ákimi.
Halyqtyń áleýmettik jaǵynan osal tobyn qoldaý aıasynda etnomádenı birlestikterdiń ókilderi men kásipkerler elý muqtaj otbasyǵa baryp, azyq-túlik tabys etti.
Alǵys aıtý kúni elimizde 2016 jyldan bastap memleket basshysynyń Qazaqstan halqy assambleıasynyń XXII sessııasynda aıtqan bastamasymen atap ótilip keledi.
