«Otandastar Qorynyń» birinshi vıse-prezıdenti Talǵat Adýovtyń aıtýynsha, jaqyn arada sheteldegi qandastarǵa arnalǵan qazaq tilin qashyqtyqtan úırenýdiń tegin kýrstary bastalady. Sabaqtar Skype arqyly onlaın rejımde ótetin bolady.
"Osy maqsatta biz ár eldegi múddeli qazaq etnomádenı jáne qoǵamdyq birlestiktermen tyǵyz baılanys ornatpaqpyz. Solardyń kómegimen ınteraktıvti taqtalarmen jabdyqtalatyn arnaıy qazaq tili kabınetterin uıymdastyramyz. Bul bastamamyz jeksenbilik mektepter jelisi sııaqty bolady. Iаǵnı, tildi úırenýshiler óz betinshe oqyp qana qoımaı, ózi sııaqty basqa da tálimgerlermen birge jınalyp, aralasa alady, sabaqty birigip óte alady. Tildi kez kelgen ýaqytta kabınetten tys onlaın oqı alý múmkindiginen bólek, olardyń betpe-bet jolyǵý alańyn uıymdastyrýymyz kerek dep sanadyq" dedi T. Adýov.
Memlekettik tildi damytý qorynyń basshysy Azat Sháýeevtiń sózine súıensek, sheteldik otandastar úshin qazaq tilin ıgerýdiń ınnovasııalyq ádisterge negizdelgen tıimdi júıesi ázirlenýde.
«Qashyqtyqtan oqytý júıesi týraly aıtar bolsaq, bizdiń «Soyle.kz» portaly negizindegi mol tájirıbemiz bar. Bul qazaq tilin ınternet arqyly onlaın rejımde úıretetin Qazaqstandaǵy alǵashqy tegin joba. Ol úlken zertteý men taldaýdyń, osy saladaǵy basqa da elderdiń tájirıbesine úńilýdiń nátıjesinde júzege asty. Sonymen qatar, sheteldik qandastardyń da suranystaryn barynsha eskerýge tyrysyp jatyrmyz. Máselen, olardyń yńǵaılylyǵy úshin biz portaldyń aǵylshyn-latyn nusqasyn da jasap shyǵardyq. Endi qazaq tilin latyn álipbıimen úırenýge bolady» dedi ol.
Sonymen qatar, kelisim aıasynda til saıasaty jónindegi is-sharalardy birlesip uıymdastyrý, elektrondyq aqparattyq keńistikte memlekettik tildi damytýǵa yqpal etetin otandyq saıttar jumysyna járdemdesý jáne sheteldegi otandastarǵa arnalǵan qazaq tili boıynsha oqý quralyn ázirleý kózdelgen.
