Sharaǵa Atyraý qalasynyń turǵyndary, ardagerler men zııaly qaýym ókilderi, Ábý Sársenbaevtyń týystary qatysty.
Atyraý oblysynyń ákimi Nurlan Noǵaev eskertkish oblys ortalyǵyndaǵy kórnekti jerlerdiń qataryn tolyqtyratynyn atap ótti.
- Memleket basshysynyń «Rýhanı jańǵyrý» baǵdarlamalyq maqalasyn iske asyrý aıasynda aımaqta ulttyq qundylyqtardy dáripteýge, Kaspıı óńirindegi tarıhı tulǵalardy ulyqtaýǵa baǵyttalǵan sharalar atqarylyp jatyr, - dedi Nurlan Noǵaev. -Búgingi shara halqyn súıgen, týǵan jerin qasterlegen aqynǵa, jazýshyǵa degen qurmet. Onyń shyǵarmalaryndaǵy keıipkerler eldiń, qazaq halqynyń taǵdyrymen tikeleı baılanysty qarapaıym adamdar boldy. Taǵdyr Ábý Sársenbaevpen tanys bolý baqytyn buıyrtqan adamdarǵa, shyǵarmashylyq murasyn búginge deıin jetkizgen týystary men jaqyndaryna alǵys aıtamyz. Osy sharaǵa qatysyp turǵan barshańyzdy aqynnyń shyǵarmashylyq murasyn zertteýge, nasıhattaýǵa shaqyramyn.
Ashylý saltanatynda sóz alǵandar Ábý Sársenbaevtyń keıipkerleri qarapaıym adamdar bolǵanyn atap ótti. Onyń shyǵarmalarynda balyqshylar ómiri týraly kóp aıtylady.
Eskertkishte jazýshynyń tutas tulǵasy músindelgen, bıiktigi – 3,5 metr. Avtory -QR Sýretshiler Odaǵynyń múshesi, mádenıet qaıratkeri Aıdarhan Qalmahanov.
Baqytgúl BABASh,
«Egemen Qazaqstan»
Atyraý
