QR Konstıtýsııalyq Keńes, Joǵary sot, Bas prokýratýra, Astanadaǵy EQYU Baǵdarlamalar Ofısi jáne Germanııanyń halyqaralyq quqyqtyq yntymaqtastyq qorynyń uıymdastyrýymen ótken «Tıimdi qylmystyq saıasat jáne qylmystyq sot isin júrgizýdiń zamanaýı úlgisi – azamattardyń konstıtýsııalyq quqyqtaryn tıisinshe qorǵaýdyń kepili» VIII ǵylymı-tájirıbelik konferensııada úsh sessııaǵa baǵyttalǵan máseleler talqylandy.
Konferensııa jumysyn dástúrli jaǵdaıda ashqan QR Konstıtýsııalyq Keńesiniń tóraǵasy Qaırat Mámı úsh sessııa jumysynda qaralatyn quqyqtyq sharalardyń ózektiligine toqtaldy. Osy kezge deıingi kezekti konferensııalar barysynda zań talaptary, halyqaralyq standarttardy engizýde birqatar ýaǵdalastyqtarǵa qol jetkizilgen. Qylmystyq jáne qylmystyq ákimshilik zańnamalaryn reformalaý birqatar jyldar boıy júrgizilip keledi. 2015 jyldan bastap Qazaqstanda memlekettiń qazirgi zamanǵy qylmystyq júıesiniń negizderin kórsetetin jańa Qylmystyq jáne Qylmystyq ákimshilik kodeks qoldanysta. Olardyń negizinde birinshi kezekte adam quqyǵy basty nazarda. Memlekettiń 2025 jylǵa deıingi strategııalyq damý josparyna sáıkes saladaǵy ózgerister qanaı jaǵdaıda da adam quqyǵy men bostandyǵy sheńberinen aspaýy tıis.
Konferensııanyń «Sotqa deıin is júrgizý reformasy: qazirgi jaǵdaıy men keleshegi» taqyrybyndaǵy birinshi sessııasynda EQYU Astanadaǵy baǵdarlamalyq ofısiniń basshysy Derd Sabo, QR Tuńǵysh Prezıdenti – Elbasynyń qory Atqarýshy dırektorynyń orynbasary, Eýropa Keńesi Venesııalyq komıssııasynyń múshesi Igor Rogov, QR Bas prokýrorynyń orynbasary Marat Ahmetjanov, QR Ishki ister mınıstriniń orynbasary Rashıd Jaqypov, Frankfýrt Bas prokýratýrasy, kıberqylmysqa qarsy kúres ortalyǵy keńsesiniń basshysy, aǵa prokýror Andreas Maı, QR Bas prokýratýrasy janyndaǵy Quqyq qorǵaý organdary akademııasynyń rektory Erǵalı Merzadınov, atalǵan vedomstvonyń Norma shyǵarmashylyq qyzmetin úılestirý basqarmasynyń bastyǵy Almaz Muhamedjanov, QR Zańnama ınstıtýtynyń bas ǵylymı qyzmetkeri Arystan Aqpanov, t.b. quqyq qorǵaý qyzmetin jańartý, izgilendirý, sotqa deıingi is júrgizýdiń qazirgi tájirıbesi, kepildikter men adam quqyǵy sııaqty taqyryptardy qozǵap, saladaǵy negizgi máselelerge oraı keńinen baıandama jasady.
Al «Azamattardyń konstıtýsııalyq quqytaryn qorǵaý basymdyqtarynyń negizinde sot tóreligin jańǵyrtý» boıynsha ekinshi sessııa jumysynda QR Joǵary sotynyń qylmystyq ister jónindegi sot alqasynyń tóraǵasy Abaı Rahmetýlın qylmystyq úrdiste básekelestikti qamtamasyz etý, sot tóreligin júzege asyrý táýelsizdigin kúsheıtý boıynsha túzetýlerdi, sot isin ońtaılandyrý men sıfrlandyrý máselesindegi ózekti jaıttarǵa toqtaldy. Al QR Joǵary sotynyń sýdıasy Anatolıı Smolın alqabıler sotynyń pármenin arttyrýǵa baılanysty usynystaryn ortaǵa salsa, kelesi kezektegi baıandamashylar sessııa taqyrybyna ortaq máselelerge qatysty málimettermen bólisti.
Konferensııanyń úshinshi sessııasy «Qylmystyq saıasatty izgilendirý jáne qylmystyq zańdy odan ári jetildirý máseleleri» taqyrybynda jalǵasatyn bolady.
Elvıra Serikqyzy,
«Egemen Qazaqstan»
ALMATY
